Ўзбекистондаги очиқлик сиёсати, иқтисодиётдаги либераллик, қонунчиликдаги демократик тамойиллар, унинг гўзал ва такрорланмас табиати, инсоният тараққиётидан гувоҳлик берувчи тарихий обидалари, беназир маданияти, тилидаги нафислик, мусиқасидаги жозибадорлик – буларнинг барчаси бу кўҳна ва навқирон юртга бўлган қизиқишни орттирмоқда. Расмий маълумотларга кўра, Хитой деб аталмиш давлатнинг ўзидагина 9 та олий ўқув юртида ўзбек тили ўқитиляпти. Аммо бу мамлакат аҳолиси орасида ўзбек тили, маданияти ва мусиқасига муҳаббат унданда юқори.

Хан Юй  билан Пекин кўчаларида тасодифан учрашиб, танишиб қолдик, бир неча лаҳза бўлсада суҳбатлашдик ва уни сизга ҳам ҳавола қилмоқчимиз.

– Исмингиз нима?

– Менинг исмим Хан Юй. Ўзбекча исмим Иззатуллоҳ.

– Иззатуллоҳ, сиз қайси хорижий тилларни биласиз?

– Мен форс, араб, рус, инглиз тиллари фонетикаси ва грамматикасини ўргандим. Энди ўзбек тилини ўрганмоқчиман.

– Сиз бу тилларни қандай ўргандингиз?

– Ёлғиз ўзим китоб, интернет орқали ўргандим.  

Хан Юй – Иззатуллоҳнинг қўлида чолғу асбоби бор эди. Биз у билан ҳам қизиқдик.

– Сиз мусиқа асбобларини чалишни биласизми?

– Мен ўзбек мусиқа асбобларидан дутор, най, уд чалишни биламан. Уларни ҳам ўзим ўргандим. Устозим мусиқа ёзувлари бўлган. Ҳозир мен “Дилхирож” куйини чалиб бераман.

– Сизга қайси куйлар ёқади ва нима учун?

– Мен Турғун Алматовнинг сато ва танбурда чалган куйларини жуда-жуда яхши кўраман. “Тановор”, “Куйгай” мақомлар жону дилим.

– Сизнинг қандай режаларингиз бор?

– Ўзбекистон тушларимга кириб чиқади. Тошкент, Бухоро, Фарғона, Самарқанд кўчаларида юргандек тасаввур қиламан ўзимни. Мен Ўзбекистонга бормоқчиман. Чунки Ўзбекистон жуда гўзал юрт.

<iframe width="560" height="315" src="https://www.youtube.com/embed/E5O-HC5lehM?si=4MDYVDDsttE2MXFq" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Муҳаммаджон Обидов,

ЎзА мухбири