Ўзбекистоннинг Германия Федератив Республикасидаги элчихонаси кўмагида ушбу давлатдаги “BREITZMANN Edelmetalle & Diamanten” энг нуфузли компаниялардан бирининг асосчиси, “Бавария – Ўзбекистон” дўстлик жамияти раиси, жаноб Карл – Хайнц Брайтцман бошчилигидаги делегация аъзолари “BMB HOLDING” тизимидаги корхоналар фаолияти билан танишиш мақсадида Жиззах вилоятида бўлди.

Немис юртидан келган мартабали меҳмонларни “BMB HOLDING” таъсисчиси Азиз Маматқулов кутиб олиб, қишлоқ хўжалиги маҳсулотларини сақлаш, саралаш, қуритиш, қайта ишлаш ва экспортга ихтисослашган – “BMB-NRC Agrologistics”, “BMB Agro Plus” корхоналари ҳамда “BMB IMPEX” маҳсулотларни тарқатиш базаси фаолияти билан таништирди.

Германиялик делегация аъзолари жараёнлар билан танишаркан, мева ва сабзавотларни бирламчи, иккиламчи ва якуний қайта ишлашдан тайёр маҳсулотгача бўлган босқичларни ўз ичига олган яхлит тизим яратилганлигини эътироф этди ҳамда келгусида мазкур корхоналарда чуқур қайта ишланган ҳамда қуритилган маҳсулотлар савдосида ҳамкорлик қилишга тайёрлигини билдирди.

Хусусан, Германиянинг савдо тармоқларига қўшилган қийматга эга чуқур қайта ишланган ҳамда қуритилган қишлоқ хўжалиги маҳсулотларининг экспорти бўйича биргаликда ишларни ташкил этишга келишиб олинди.

А.Қаюмов, ЎзА мухбири