Маълумки, айни кунларда Россия Федерациясининг Сочи шаҳрида Бутунжаҳон ёшлар фестивали бўлиб ўтмоқда.

Мазкур йирик халқаро тадбирда бизнес, халқаро ҳамкорлик, маданият, фан, таълим, спорт каби жамият ҳаётининг турли жабҳаларида фаолият юритаётган россиялик ёшлар билан бирга 200 га яқин давлатдан келган ёшлар етакчилари, болалар ташкилотларидан мутахассислар ҳам қатнашмокда.  

"Росатом” корпорацияси Бутунжаҳон ёшлар фестивали дастури доирасида Шимолий қутбга илмий экспедиция учун йўл оладиган 15 нафар ёшдан иборат иштирокчилар гуруҳини шакллантирди.

Танлов жараёнлари 28 февраль –  Арктика кунида бошланиб, бир неча босқичда ўтказилди. Айтиш мумкинки, дунёнинг турли нуқталаридан жами икки мингдан ортиқ ёшдан ариза келиб тушди. Номзодлар экспедиция дастури учун ижодий ва инновацион ечимларни таклиф қилиб, интеллектуал баҳсларда билимларини синовдан ўтказишди. Куни кеча Бутунжаҳон ёшлар фестивалида якуний саралаш босқичи бўлиб ўтди. Иштирокчилар ҳакамлар ҳайъатига Арктикада илмий ёшлар экспедицияси доирасида қўллаш мумкин бўлган ноёб лойиҳаларини тақдим этди.

Қувонарлиси, экспедиция иштирокчилари орасида Камерун, Бангладеш, Тунис, Беларусь ва Россия вакиллари қаторида ўзбек қизи ҳам муносиб ўрин эгаллади. Қаҳрамонимизнинг қалбидаги шижоати ва тиришқоқлиги барчани ҳайратга солди.

[gallery-16279]

– Мен Арктикани ўз кўзим билан кўришни орзу қилардим, бугун эса ниятим ушалмоқда, – дейди Тошкент шаҳридаги  "ММФИ" Миллий тадқиқот ядро университети филиали 4-курс талабаси Шаҳзода Ёқубова. – Экспедиция давомида Шимолий қутбга яқинлашиш жараёнида космик нурларни ўрганишни мақсад қилдим. Қолаверса, мавзу доирасида бир қатор семинарларда қатнашиб, ёш олимлар клуби аъзолари билан биргаликда ушбу йўналишдаги изланишларимни давом эттирмоқчиман. Бу биз каби ўзбек ёшлари учун катта марра.  

<iframe width="650" height="420" src="https://www.youtube.com/embed/bIRJR5wNnTI" title="" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" allowfullscreen></iframe>

Нилуфар Бозорова, ЎзА мухбири.

Сочи.