Жорий йилнинг 29–30 сентябрь кунлари Мўйноқ тумани ва Нукус шаҳрида Сулаймон Боқирғоний таваллудининг 900 йиллигига бағишланган халқаро конференция, “Орол ва Мўйноқнинг қайта тикланиши” халқаро рассомлар ва ижодкорлар фестивали, “Орол балиқларидан 99 хил таом” гастрономик фестивали ўтказилади.
– Давлатимиз раҳбарининг жорий йил 23–24 февраль кунлари Қорақалпоғистон Республикасига ташрифи давомида берилган топшириқлар ва 25 февраль куни ўтказилган мажлис баёнига мувофиқ туркий авлиё дея таърифланувчи, афсонавий сўфий шайх, шеъриятнинг йирик намояндаларидан бири бўлган Ҳаким ота – Сулаймон Боқирғоний таваллудининг 900 йиллигига бағишланган халқаро конференция, шунингдек Мўйноқ туманига хорижий сайёҳлар оқимини кўпайтириш, айниқса ички туризмни ривожлантириш мақсадида “Орол ва Мўйноқнинг қайта тикланиши” халқаро рассомлар ва ижодкорлар фестивали, “Орол балиқларидан 99 хил таом” гастрономик фестивалини ўтказишни ташкил қилиш вазифаси белгиланган эди, – дейди Қорақалпоғистон Республикаси Туризм ва маданий мерос вазирлигининг бош мутахассиси Икрамбек Рузимбаев. – Мазкур топшириқлар ижросини таъминлаш мақсадида Ўзбекистон Республикаси Вазирлар Маҳкамасининг тегишли мажлис баёни тасдиқланди.
Ташкилий қўмита томонидан тасдиқланган режага мувофиқ, 29 сентябрь куни Мўйноқ тумани марказида балиқ таомларидан мусобақалар, маҳорат дарслари, рассомлар ва ҳунармандлар кўргазмалари, давра-суҳбатлари, Сулаймон Боқирғоний мақбараси атрофида олиб борилаётган археологик тадқиқот ишлари билан танишиш, зиёратгоҳлар ва бошқа диққатга сазовор жойларга ташрифларни ташкил қилиш, 30 сентябрь куни эса Нукус шаҳрида конференциянинг очилиш маросими ва анжуман секцияларга бўлинган ҳолда давом эттирилиши режалаштирилган.
Ҳаким ота – Сулаймон Боқирғоний таваллудининг 900 йиллигига бағишланган халқаро конференциясида Қорақалпоғистон Республикаси, вилоятлар ва Тошкент шаҳри билан бирга Қозоғистон, Қирғизистон, Тожикистон, Россия ва Туркия давлатларидан олимлар, профессор-ўқитувчилар ва бошқа илм вакиллари иштирок этиши кутилмоқда.
Довуд Абибуллаев, ЎзА