Президент таълим муассасалари агентлиги томонидан STEM фанлари (математика, физика, кимё, биология, science ҳамда информатика ва ахборот технологиялари) бўйича олимпиаданинг агентлик босқичи бўлиб ўтди.

Бунда жорий йилнинг 16-19 февраль кунлари агентлик таркибидаги Президент, ижод ва ихтисослаштирилган мактаб ўқувчилари иштирокида ўтказилган олимпиаданинг мактаб босқичида 1-, 2-, 3-ўринни эгаллаган 1158 нафар ўқувчи иштирок этиб, улар 3 босқич: ёзма иш, тест ва лаборатория босқичлари бўйича синовдан ўтишди. Ушбу танлов агентлик тизимидаги барча мактабларда ташкил этилди ва мактаб ўқувчиларининг билим, кўникмалари синовдан ўтказилди.

Олимпиаданинг агентлик босқичда ғолибликни қўлга киритган ўқувчи ёшларни ноутбук, телевизор ва планшет каби қимматбаҳо совғалар кутмоқда.
Олимпиада натижалари асосида ҳар бир фан бўйича энг юқори натижаларга эришган ўқувчилар агентлик терма жамоаси сафига киритилиб, юқори тажрибага эга бўлган мутахассислар томонидан мунтазам равишда халқаро ва нуфузли олимпиадаларга тайёрлаб борилади.

Файзулло Яҳёев, ЎзА