АҚШ Президенти Дональд Трамп миллий хавфсизлик бўйича маслаҳатчиси Майкл Уолтсни лавозимидан четлатди ва мамлакатнинг Бирлашган Миллатлар Ташкилотидаги элчиси этиб тайинлади. Бу ҳақда «IRNA News» ёзган.

Шунингдек, Давлат котиби Марко Рубио миллий хавфсизлик бўйича муваққат маслаҳатчи бўлиши ҳам маълум қилинган.

Ўтган ой Уолтс махсус хабар алмашиш иловасига бир журналистни тасодифан қўшиб, жавобгарликни зиммасига олган эди. Мазкур гуруҳ суҳбатида юқори мартабали амалдорлар Яманга ҳарбий зарба бериш режасини муҳокама қилган.

Етакчининг аксар маслаҳатчилари «ўта шафқатсиз» дея таърифлашадиган Флорида штатидан собиқ конгрессмен Уолтс Трампнинг иккинчи муддатида ҳокимиятни тарк этган илк йирик амалдордир.

Вашингтон ва Киев Украина табиий ресурслари бўйича келишув имзолади

30 апрель куни АҚШ ва Украина нодир металлар қазиб олишда ҳамкорлик қилиш ҳамда мамлакатни тиклаш бўйича Америка-Украина сармоя жамғармасини ишга тушириш тўғрисида келишув имзолади. Битимга кўра, томонлар тенг ҳуқуққа эга бўлади ва муҳим материаллар, нефть ва газ соҳасида янги лойиҳалар амалга оширади. Шу билан бирга Украина ҳудудидаги барча ресурслар, шунингдек «Укрнафта» ва «Энергоатом» давлат корпорациялари мулк сифатида Киев назорати остида қолади. Энди ҳужжат Олий Рада томонидан ратификация қилиниши зарур.

Украина Бош вазири ўринбосари Юлия Свириденко таъкидлашича, келишув доирасида инвестиция фонди биргаликда бошқарилади, томонларнинг ҳеч бири ҳал қилувчи овозга эга бўлмайди.

– Тузилаётган жамғармада улуш ва бошқарув ҳуқуқи тенг, – деб ёзди сиёсатчи ижтимоий тармоқдаги саҳифасида. – Тўлиқ эгалик ва назорат Украинада қолади. Ҳудуд ва сувимиздаги барча ресурслар ўзимизга тегишли. Қаердан ва нима қазиб олишни айнан давлатимиз белгилайди. Ер ости бойликлари Украина мулки бўлиб қолади – шундай келишув таъминланган.

АҚШ молия вазири Скотт Бессент ҳам битим имзоланганини тасдиқлади.

“Reuters” агентлиги ёзишича, қўшимча яна икки ҳужжатни имзолаш режалаштирилган. Фақат Киев бу масалани ўрганиши учун қўшимча вақт сўраган.

Украина Бош вазири Денис Шмигал 27 апрел куни Бессент билан учрашуви якунида Киев Американинг илгари кўрсатган молиявий ёрдами ер қаъри бўйича келишувга қарз мажбурияти сифатида киритилмаслигига эришган.

– Ушбу келишув Россияга Трамп маъмурияти эркин, суверен ва гуллаб-яшнаган Украинани яратишга қаратилган узоқ муддатли тинчлик жараёни тарафдорилиги ҳақида аниқ хабар беради, – деган мулозим вазирлик эълон қилган баёнотда. – Украинани тиклашга Россия ҳарбий-саноат мажмуасини молиялаштирган давлатлар ва шахслар жалб қилиниши тақиқланади.

Буюк Британия ташқи ишлар вазири Девид Лемми битим имзоланганини олқишлаган. У ижтимоий тармоқ саҳифасида Қиролликнинг Украина билан бир асрлик ҳамкорлик шартномасига содиқлигини алоҳида таъкидлаган.

Ушбу ҳафта Лондондаги музокарадан сўнг Қўшма Штатлар Киев вакиллари ва Европа Иттифоқи вакиллари Украинадаги можарони тартибга солиш жараёнининг бир қисми сифатида келишиб олинган 22 аниқ шартдан хабардор қилинди, деди АҚШ Президентининг махсус вакили Кит Келлог.

У “Fox News” телеканалига билдиришича, томонлар биринчи навбатда тинчлик келишувига олиб келиши мумкин бўлган ва камида 30 кун давом этадиган тўлақонли ўт очишни тўхтатишдан манфаатдор:

– 30 кун нега муҳим? Доимий тинчлик ташаббусини қўллаб-қувватлаш учун. Президент Дональд Трамп айнан шунга эришмоқчи.

Шунингдек, ўтган ҳафта сўнггида  Трамп ва Зеленский Рим Папасининг дафн маросимида учрашди. Трамп Ватикандаги учрашувда АҚШдан қўшимча қурол сўраганини ошкор қилди. Америка етакчиси эса бунга жавобан, аввало суҳбатдошининг Россия билан тинчлик жараёнидаги ижобий ҳаракатига гувоҳ бўлиш истагида эканини таъкидлаган.

– У кўпроқ қурол кераклигини айтди, – деди у учрашув тафсилотига тўхталиб. – Бу сўров уч йилдан бери такрорланади. Ҳар икки томон қандай йўл тутишини кўрамиз.

Шанба куни икки етакчи Рим Папаси Францискнинг дафн маросимида “жуда қисқа” учрашув ўтказгани хабар қилинган эди. Зеленский ушбу мулоқотни изоҳларкан, Америка раҳбари билан “кўп нарсани муҳокама қилишга улгургани”ни айтиб, ҳамкасбига миннатдорлик билдирди.

КХДР Россияга қўшин юборганини тасдиқлади

Жанубий Корея ва Ғарб разведкаси анча вақтдан бери Пхенян Россиянинг Курск вилоятига минглаб аскар жўнатганини даъво қилиб келаётган эди.

Ниҳоят етакчи Ким Чен Ин буйруғига кўра, Шимолий Корея ҳарбийлари РФ чегара ҳудудини “тўлиқ озод қилишда” ёрдам бергани маълум қилинди. Бу ҳақда BBC ёзди.

Тегишли баёнот Россия Қуролли кучлари Бош штаби бошлиғи Валерий Герасимов КХДР қўшинининг “қаҳрамонлиги”ни олқишлагандан бир неча кун ўтиб янгради.

Шунингдек, Москва федерация ғарбидаги Курск вилояти устидан тўлиқ назорат ўрнатилганини ҳам эълон қилди. Украина эса бу хабарни рад этган.

Баёнотга жавобан, АҚШ Шимолий Корея энди урушни давом эттириш масъулиятини зиммасига олиши кераклигини айтди.

Қўшин жойлаштириш қарори Пхенян ва Москва ўртасидаги мудофаа бўйича ўзаро келишувга мувофиқ қабул қилинди, дея хабар берган KCNA.

– Адолат учун курашганларнинг барчаси қаҳрамон ва ватан шаъни ҳимоячилари, – деди Ким. – КХДР ва РФ Курскда “иттифоқчилик ва биродарлик” намунасини кўрсатиб, “қон билан тасдиқланган дўстлик” муносабатини ҳар томонлама мустаҳкамлашга салмоқли ҳисса қўшди.

Исроил ўрмон ёнғини билан курашни давом эттирмоқда

Исроил ёнғин хизмати мамлакат тарихидаги энг кучли ёнғинга қарши курашмоқда. Айни пайт 150 дан зиёд жамоа оловни ўчириш билан банд.

Бош вазир Биньямин Нетаньяҳу чоршанба куни Қуддус яқинида бир неча ёнғин кўтарилгач, миллий даражада фавқулодда ҳолат эълон қилди. Унинг сўзларига кўра, тез ва қуруқ шамол “ўлимга олиб келадиган вазият”ни вужудга келтирган.

Бир неча шаҳарча аҳолиси кўчирилган. Шунга қарамасдан, шаҳарга олиб борадиган асосий йўллар очилган.

<iframe width="791" height="445" src="https://www.youtube.com/embed/NIp-p6GKVFc" title="Oq uyda ilk iste’fo, Isroil olov ichida va Kiev rozi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Тез ёрдам хизмати 23 киши асосан тутундан нафас олиш ва куйиш ҳолати билан даволанаётганини маълум қилди.

Исроил ўтни ўчириш учун халқаро миқёсда ёрдам, жумладан махсус самолётлар сўраган.

Мамлакат мустақиллиги куни муносабати билан ташкил қилинган кўплаб оммавий тадбирлар бекор қилинган.

Сардорбек Поёнов, Анвархўжа Аҳмедов (видео), ЎзА.