Осиё чемпионлар лигасининг “В” гуруҳида иккинчи тур учрашувлари бўлиб ўтди. Унда “Насаф” – “Ал-Садд”, “Шаржа” – “Ал-Файсали” жамоалари ўзаро баҳслашди.

Қарши шаҳридаги “Марказий” стадионда ўтказилган ўйинда “Насаф” 3:1 ҳисобида зафар қучди. Учрашувнинг 29-дақиқасида Суҳроб Нуруллоев ҳисобни очган бўлса, Азизбек Амонов 46 ва 57-дақиқаларда гол уриб ўз номини таблога ёздириб қўйди. 81-дақиқада эса “Ал-Садд” жамоаси аъзоси Булайим Ҳухи ҳисобни қисқартирди.

Гуруҳнинг иккинчи ўйинида “Шаржа” ўз майдонида Мусса Марега томонидан 20-дақиқада киритилган гол эвазига ғолиб бўлди. Шу тариқа, ушбу турдан сўнг “Насаф” 6 очко билан гуруҳ пешқадамига айланган бўлса, “Шаржа” клуби 4 очко билан 2-ўринга кўтарилиб олди. Шунингдек, “Ал-Садд” 1 очко билан учинчи, “Ал-Файсали” эса кетма-кет икки мағлубиятдан сўнг тўртинчи ўринга тушиб қолди.

Бугун, 3 октябрь куни Осиё чемпионлар лигаси “А” ва “D” гуруҳларида иккинчи тур учрашувлари бўлиб ўтади.

“А” гуруҳида Тошкентнинг “Пахтакор” жамоаси Саудия Арабистонида “Ал-Фейҳа”га қарши баҳс олиб борса, Наманганда “Навбаҳор” Ҳиндистон клуби “Мумбай Сити”га қарши майдонга тушади.

Жавоҳир Тошхўжаев, ЎзА