Аёллар ўртасидаги Осиё чемпионлар лигасининг дастлабки босқичида "Насаф" жамоаси "B" гуруҳида иккинчи учрашувини "Ал Насср" (Саудия Арабистони) клубига қарши ўтказди.
Қаршидаги "Марказий" стадионда ўтган ушбу ўйинда "Насаф" 1:0 ҳисобида ғалаба қозонди. Учрашувдаги ягона гол, ўйиннинг 71-дақиқасида Людмила Карачикнинг бурчакдан тўғридан-тўғри дарвозага йўллаган зарбаси орқали дарвозага кириб кетди. Мазкур ғалабадан сўнг, "Севинч" очколарини 6 тага етказиб олди.
Дарвоқе, "Насаф" клуби илк турда АПФ (Непаль) жамоасини 3:0 ҳисобида енгган эди. Энди жамоамиз учинчи турда гуруҳда 6 очко билан пешқадам бўлиб турган Таиланднинг"BG College of Asian Scholars" клубига қарши ўйин ўтказади. 31 август куни бўлиб ўтадиган мазкур ўйин ғолиби ОЧЛ гуруҳ босқичига йўлланма олади.
Маълумот ўрнида: Осиё чемпионлар лигасининг гуруҳ босқичига қуръа 11 сентябр куни ташланади ва мусобақа 3 октябрдан бошланади.
Жавоҳир Тошхўжаев, ЎзА