Санитария-эпидемиологик осойишталик ва жамоат саломатлиги қўмитаси Навоий вилоят бошқармасида вилоят Адлия бошқармаси билан ҳамкорликда 9 декабрь – Халқаро коррупцияга қарши курашиш куни муносабати билан ўтказилаётган “Аксилкоррупция” ойлиги доирасида “Очиқ эшиклар куни” тадбири ташкил этилди.

Унда коррупцияга қарши курашиш бўйича давлат сиёсати, коррупцияга йўл очиб берадиган механизмларга қарши муросасиз муносабатни шакллантириш, рақамли иқтисодиётни жорий этиш орқали инсон омилини камайтириб, адолатли, шаффоф тизимни яратиш, порахўрлик, қариндош-уруғчилик ва таниш-билишчиликнинг олдини олиш борасида амалга оширилаётган ишлар ҳақида маълумот берилди.  

Бугунги кунда жаҳон миқёсида коррупцияга қарши курашиш энг долзарб масалалардан бири ҳисобланади. Бу борада кўплаб халқаро ҳужжатлар ҳам қабул қилиниб, улар асосида ушбу иллатга қарши чоралар кўрилмоқда.

– Коррупция шундай иллатки, уни бир ёки икки идоранинг саъй-ҳаракати билан йўқ қилиб бўлмайди, – дейди вилоят Адлия бошқармаси бош юрисконсульти Пўлат Ўроқов. – Қачонки, барча фуқароларимиз, жамият унга қарши биргаликда курашиб, унинг илдизини йўқ қилишга киришилсагина ижобий натижага эришиш мумкин. Зеро, давлатимиз раҳбари таъкидлаганидек, “коррупция – бу давлатимизни ич-ичидан емириб, миллий хавфсизлигимизга рахна соладиган ғоят хатарли таҳдид ва унга қарши муросасиз кураш олиб бориш – барчамизнинг бурчимиздир”.

Мамлакатимизда ҳам бу борада тегишли давлат органлари, фуқаролик жамияти институтлари ва нодавлат ташкилотлар томонидан ҳам кенг кўламли тадбирлар белгиланиб, бюрократик тўсиқларни бартараф этиш ва “яширин иқтисодиёт”ни қисқартириш чоралари кўрилмоқда ҳамда “Коррупциясиз соҳа” лойиҳаси амалга оширилмоқда.

Республикамизда 2017 йил 3 январда 33 моддадан иборат “Коррупцияга қарши кураш тўғрисида”ги қонун қабул қилинган бўлиб, унда “коррупция”, “коррупцияга оид ҳуқуқбузарлик”, “манфаатлар тўқнашуви” каби асосий тушунчаларга изоҳ берилган. Шунингдек, коррупцияга қарши курашишнинг асосий принциплари белгиланган.  

[gallery-20516]

Жумладан, қонуннинг 4-моддасига кўра, коррупцияга қарши курашишнинг асосий принциплари сифатида қонунийлик, фуқаролар ҳуқуқлари, эркинликлари ва қонуний манфаатларининг устуворлиги, очиқлик ва шаффофлик, тизимлилик, давлат ва фуқаролик жамиятининг ҳамкорлиги, коррупциянинг олдини олишга доир чора-тадбирлар устуворлиги, жавобгарликнинг муқаррарлиги кўрсатиб ўтилган.

Тадбир сўнггида иштирокчилар ўзларини қизиқтирган саволларга атрофлича жавоб олди.

А.Бўриев, С.Аслонов (сурат), ЎзА мухбирлари