АҚШнинг Сент-Луис шаҳрида давом этаётган шахмат бўйича “Sinquefield Cup-2025” халқаро турнирининг ортда қолган 3-турида Нодирбек Абдусатторов оқ доналарда Рамешбабу Праггнанадха билан, Польшада ўтаётган “61st Rubinstein Memorial-2025” турнирининг 5-турида Нодирбек Ёқуббоев қора доналарда чехиялик Дэвид Навара билан дурангга имзо чекди.

“61st Rubinstein Memorial-2025” турнирининг 6-тур ўйинлари остонасида Нодирбек Ёқуббоев 3,5 очко билан қўшимча кўрсаткичларга кўра, пешқадамлик қилмоқда. Кейинги ўринлардан жой олган польшалик Радослав Войташек ва германиялик Маттиас Блюбаум ҳисобида ҳам 3,5 очко мавжуд.

Бугун, 21 август куни ташкил этиладиган 6-тур ўйинида Ёқуббоев турнирда 2 очко билан 9-ўринда бораётган польшалик Павел Теклафга қарши дона суради. Ҳамюртимизнинг таъқибчилари Радослав Войташек ва Маттиас Блюбаум айнан ушбу турда рўбарў келади.

Сент-Луисда кечаётган ўйинларнинг 3-туридан кейин АҚШ вакили Фабиано Каруана 2 та дуранг, 1 та ғалаба ҳолатида 2 очко билан пешқадамлик қилаётган вазиятда, ҳамюртимиз Нодирбек Абдусатторов Рамешбабу Праггнанадха билан дурангга эришиб, ярим очко билан турнир жадвалининг сўнгги қаторидан жой олиб турибди.

Бугун ўтказиладиган 4-турда Абдусатторов оқ доналарда турнирда карвонбошилик қилаётган Каруанага қарши кураш олиб боради.

Айнан ушбу баҳс мукофот жамғармаси 350 минг АҚШ долларидан иборат Сент-Луис  турнирида Нодирбекнинг кейинги турлардаги кайфиятига таъсир кўрсатиши мумкин.

АҚШ ва Польша мусобақаларида Ўзбекистон шахмат байроғини юксалтириш йўлида шиддат кўрсатаётган Нодирбекларга зафар ёр бўлишини тилаймиз.

Эслатиб ўтамиз, "Rubinstein Memorial-2025"нинг сўнгги тур ўйини 25 август, “Sinquefield Cup-2025”нинг охирги баҳслари 29 августда бўлиб ўтади.

Т.Рўзиев,

ЎзА