Олий Мажлис Қонунчилик палатасининг навбатдаги мажлисида кичик ва ўрта бизнесни молиявий қўллаб-қувватлаш тизимини такомиллаштиришга қаратилган қонун лойиҳаси биринчи ўқишда муҳокама қилинди.

Таъкидланганидек, ушбу қонун лойиҳаси тадбиркорлик субъектларини молиявий қўллаб-қувватлаш механизмини кенгайтириш, тадбиркор томонидан нобанк кредит ташкилотларидан кредит олишида мавжуд ҳуқуқий тўсиқларни бартараф этишга қаратилган. Қонун лойиҳаси кредит олувчига кафолат (кафиллик) бериш фаолиятини профессионал асосда амалга оширувчи кафолатлар бериш ташкилотини ташкил этишга оид ҳуқуқий нормаларни ўз ичига олган. 

Шунингдек, лойиҳа билан нобанк кредит ташкилотларини акциядорлик жамияти ёки масъулияти чекланган жамият шаклида ташкил этиш, микромолия ташкилотлари томонидан мижозларга хорижий валютада молиявий хизматлар кўрсатиш ҳамда микромолия ташкилотларига тегишли лицензия олган ҳолда тўлов ташкилоти фаолиятини амалга ошириш имкониятлари яратилмоқда. 

Бундан ташқари, лойиҳада жисмоний ва юридик шахслар томонидан нобанк кредит ташкилотининг устав капиталидаги олинаётган улуш миқдори 10 фоиздан 20 фоизгача бўлганда, Марказий банкнинг хабардор қилиш тартиби қўлланилиши кўзда тутилган. 

Қайд этилганидек, қонун лойиҳасининг қабул қилиниши билан тадбиркорлик субъектларининг молиявий хизматлардан фойдаланиш имконияти янада кенгайтирилади, бизнесни қўллаб-қувватлаш ҳамда тадбиркорлик лойиҳаларини молиялаштиришнинг янгича воситалари яратилади. 

М.Комилова, ЎзА