Нигериянинг Риверс штатидаги Омоку ҳудудида ноқонуний қазиб олинган нефть сақланаётган уйда портлаш юз берди, дея хабар берган “Анадолу” ахборот агентлиги.

Маълумотга кўра, ҳодиса оқибатида беш киши тириклайин ёниб кетган, бир неча одам жароҳатланган.

Африка қитъасидаги бой нефть ва газ захирасига эга ушбу мамлакат ҳукумати мунтазам равишда қора олтинни ўғирлаш билан боғлиқ муаммоларга дуч келади. Бу жиноятлар мамлакат иқтисодиёти ривожига жиддий салбий таъсир кўрсатади.

Масалан, 2023 йил нефть ўғирлаш ва қувурларга ҳужум уюштириш ортидан Нигерия уч миллиард доллардан кўпроқ зарар кўргани маълум.