Эроннинг Исроилга жавоб зарбаси чоғи 20 нафарга яқин одам жароҳат олган. Исроил ёнғин хизмати хабар беришича, махсус гуруҳлар асосан Тель-Авивда бир неча ёнғин ўчоғини сўндириш билан банд. Айрим фуқаролик манзиллари зарар кўрган, кўп қаватли уйлар вайроналари остида одамлар қолиб кетган. Қатор давлат ташкилотлари, муҳим бинолар нишонга олингани маълум.

Эрон томони яҳудий давлатини 100 тагача ракета билан ўққа тутган. Исроил мудофаа кучлари вакили таъкидлашича, ракеталарнинг аксарияти тутиб қолинган. Шу билан бирга аҳоли ўз ҳудудидаги талофат тасвирларини ижтимоий тармоққа жойлаштирмоқда.

Бош вазир Биньямин Нетаньяху Эрон халқига мурожаат қилиб, исён кўтаришга чақирган. Унинг фикрича, мамлакат раҳбарияти бир неча вакили йўқ қилинган бир пайт ҳукуматга қарши чиқиш айни муддао. Эрон ахборот агентлиги Исроилга зарба бериш жараёнида биринчи марта сув ости кемалари баллистик ракеталарини қўлланганига эътибор қаратган. ОАВ хабарларида Теҳрон Исроилнинг ракета ишлаб чиқариш марказларига, шунингдек ҳарбий саноат объектларига зарба бергани айтиляпти. Ислом инқилоби қўриқчилари корпуси маълумотига кўра, ўнлаб баллистик ракета душманнинг стратегик мақсадли манзилларига сезиларли талофат етказган.

Нетаньяху эса, ўз навбатида, бир кун ичида Эрон баллистик ракеталари захирасининг салмоқли қисми, шунингдек уран бойитиладиган энг йирик мажмуа вайрон қилинганини такрорламоқда. Халқаро атом энергияси раҳбари Рафаэль Гросси Эроннинг 60 фоизгача бойитилган уран ишлаб чиқарадиган ер усти заводи йўқ қилингани тўғрисида баёнот берди.                                                                                 

С.Поёнов,ЎзА