Фарғона ўзбек футболи бешикларидан бири экани барчага маълум. “Нефтчи” футбол клуби эса Ўзбекистоннинг 5 карра чемпиони, беш марта кумуш медаль соҳиби, халқаро миқёсдаги турнирлар ғолиби бўлган. 2025 йил футбол мавсуми тугашига уч тур қолди.

Ҳозир “Нефтчи” “Насаф”дан икки очко фарқ билан биринчи ўринда бормоқда ва чемпионликни эгаллаш учун астойдил ҳаракат қиляпти.

Футболда шундай натижаларга эришган вилоят бош жамоаси қошида футбол академияси очилди. Айни кунларда унга иқтидорли ёшларни қабул қилиш бошланди.

– Ёш футболчилар аввало жисмонан соғлом ва иқтидорли бўлиши лозим, – дейди “Нефтчи” футбол академияси директори Игор Химич. – Ҳозир 11-15 ёшдаги болаларнинг жисмоний имкониятларини синовдан ўтказяпмиз.

Бир неча юз ёшлар футбол академиясига ўқишга кириш истагини билдирдилар. Аризалар онлайн тарзда қабул қилинган.

– Биз аввало “Нефтчи” клуби учун, қолаверса мамлакат терма жамоаси учун истеъдодли футболчилар тарбиялаб етказамиз. Агар 9-11 ёшлилар эрталабдан кечгача машғулотларда қатнашса, 12-15 ёшлилар шу ерда яшайди, овқатланади, мактаб дастури асосида таълим олади, – дейди академия директори.

“Нефтчи” футбол академиясида 6 та соҳа мураббийи, 25 нафар мутахассис, улар орасида руҳшунос, тарбиячи, таҳлилчилар бор, улар ёш футболчилардан келажак юлдузларини етиштирадилар.

<iframe width="640" height="420" src="https://www.youtube.com/embed/ZHpwdZUq4dA" title="“Neftchi” futbol akademiyasi faoliyatini boshladi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Муҳаммаджон Обидов, Элёр Олимов (видео, сурат), ЎзА