Бухородаги олтита давлат ихтисослашган умумтаълим мактабларига робототехника қурилмалари етказиб берилди. Бу ҳақида Бухоро вилояти мактабгача ва мактаб таълими бошқармаси матбуот хизмати маълум қилди.

Таълим соҳасида робототехника қўлланса, болалар атрофлича фикрлаш, мустақил қарор қабул қилишни ўрганиши осон кечади. Аниқ фанлар бўйича олган назарий билимларини амалиётда қўллайди.  

Мактабгача ва мактаб таълими вазирлиги томонидан Бухоро шаҳридаги 4-, Пешку туманидаги 1-, Олот туманидаги 1-, Вобкент туманидаги 40-, Қоракўл туманидаги 15- ва Ғиждувон туманидаги 45-ИДУМларнинг ҳар бирига икки тўпламдан иборат робототехника қурилмалари етказиб берилди.  

Эндиликда ушбу муассасаларда робототехника тўгаракларини ташкил этиш орқали физика, математика, информатика дарсларини чуқурроқ ўрганиш, ёшларнинг теран фикрлаш қобилиятини ривожлантириш, жамият ҳаётида ўз ўринларини топишларида жуда катта ижобий ўзгаришга эришиш мумкин.  

Зариф Комилов, ЎзА