Партиясиз номзод, адвокат Наташа Пирц-Мусар Словения Республикасининг биринчи аёл Президенти бўлди.
Овоз бериш якшанба куни тахминан 3 мингта сайлов участкасида бўлиб ўтди. Овоз бериш ҳуқуқига 1,7 миллионга яқин киши эга бўлган. Сайлов комиссиясининг расмий сайтида кўрсатилишича, берилган овозларнинг 98,29 фоизи ҳисоблаб чиқилган.
Сўнгги маълумотларга кўра, Пирц-Мусар 54,03 фоиз овоз, унинг рақиби Логар эса 45,96 фоиз овоз олишга муваффақ бўлган.
Давлатнинг олий лавозимига собиқ ташқи ишлар вазири Анже Логар ҳам даъвогар бўлганди. У сайлов натижаларига бағишлаб ўтказилган брифингда, "Наташа Пирц-Мусар Словениянинг бешинчи Президенти ва биринчи аёл Президент бўлади, уни табриклайман", – деб баёнот берган.