Футбол бўйича Ўзбекистон Суперлигасининг 18-туридан ўрин олган «Навбаҳор» — «Насаф», «Динамо» — «Бунёдкор» жамоалари ўртасидаги учрашувлар бўлиб ўтди.

Намангандаги «Марказий» стадионида ўтказилган «Навбаҳор» — «Насаф» клублари тўқнашувининг 56-дақиқасида Жаба Жигаури гол урди ва «Насаф»нинг ғалабасини таъминлади. Шу тариқа, «Насаф» очколарини 41 тага етказиб олди ҳамда турнир жадвалидаги пешқадамлигини янада мустаҳкамлади.

Самарқандда ўтган «Динамо» — «Бунёдкор» баҳсида 2:3 ҳисоби қайд этилди. Узоқ кутилган ғалабадан сўнг «Бунёдкор» жамоаси очколарини 15 тага етказиб олди.

Бугун Суперлиганинг 18-туридан ўрин олган «Андижон» — «Локомотив» баҳси бўлиб ўтади. Мазкур ўйин «Бобур арена»да соат 19:30 да бошланади. Учрашувни бош ҳакам сифатида Шавкат Насибуллаев бошқаради.  

Унга қанотларда Дилшод Жуманиёзов ва Руслан Серазитдинов ёрдам берса, VARда Иброҳим Исмоилов ҳамда Кристина Середа ишлайди.

Шу ўринда, «Андижон» — «Локомотив» ўртасидаги ўйин олдидан жамоаларнинг ўзаро учрашувлари ҳақида айрим маълумотларни эътиборингизга ҳавола этамиз.

Жамоалар чемпионатда ҳозирга қадар 27 маротаба тўқнаш келган ва «Андижон» ушбу учрашувларда 5 марта зафар қучган бўлса, «Локомотив» 18 ғалабани қўлга киритган. 4 та ўйин эса дуранг билан якунланган. Тўплар нисбати 27/53 -«Локомотив» фойдасига.

Эътиборлиси, «Андижон» ўз майдонида «Локомотив»ни сўнгги бор 2010 йилда мағлубиятга учратган.

Жавоҳир Тошхўжаев,

ЎзА