Европа Иттифоқи ташқи ишлар ва хавфсизлик сиёсати бўйича олий вакили Кая Каллас Украинадаги уруш яна бир неча йил давом этишини айтди. У нимага асосланиб бундай хулосага келди? Уруш ростдан ҳам чўзиладими?

11 сентябрга ўтар кечаси Россия қўшинлари Украинага 66 дрон билан ҳужум қилди. Украина ҳаво мудофааси учоқлардан 62 тасини йўқ қилишга муваффақ бўлган.

Каллас журналистлар билан суҳбатда Украинадаги уруш яна бир неча йил давом этиши мумкинлигини айтган.

– Афсуски, тинчлик ҳаракати, жумладан АҚШ Президенти Дональд Трампнинг саъй-ҳаракати ҳам натижа бермади, – деган у. – Россия жараённи бутунлай инкор қилмоқда.

Америка етакчисининг Украина бўйича махсус вакили Кейт Келлог 11 сентябрь куни Киевга келди. Маҳаллий оммавий ахборот воситалари ушбу ташриф Украинага ҳужум кучайиши асносида амалга ошганини ёзмоқда.

АҚШ вакили август ойидаги аввалги ташрифи чоғида “кейинги йил Украина мустақиллик байрамини тинч ва мусаффо осмон остида нишонлайди”, дея умид билдирган эди. Афсуски, вазият борган сари чигаллашиб, уруш тугашига ишонч сўниб бормоқда.

Масалан, Швеция Украинага 9,2 миллиард крон миқдорида ҳарбий ёрдам кўрсатишини айтди. Мамлакат мудофаа вазири Пол Йонсон Стокгольм Киевни ҳарбий қўллаб-қувватлаш кучайтирилаётгани ва шу орқали Россияга босимни ошириш кўзда тутилаётганини билдирди.

Польша эса ҳаво ҳудудини ёпди. Россия дронлари мамлакат чегарасига кириб келгач, Беларусь ва Украина билан чегарадош ҳаво ҳудудида парвоз чекланди. Тақиқ 2025 йил 10 сентябрдан 9 декабргача амал қилади.

Демак, уруш барҳам топишидан дарак йўқдек.

Наҳотки Каллас ҳақ?

<iframe width="650" height="420" src="https://www.youtube.com/embed/ghNTgGCBiL4" title="Nahotki Kallas haq?!" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Кенжа Бекжонов, Искандар Исматов, ЎзА