Инсоннинг кўзи ожиз бўлиши мумкин, лекин қалби очиқ бўлса, оламни кўра олади.  Тўғриси, пойтахтимиздаги “Касбий кўникмалар маркази”да кўриш қобилияти пасайган фуқаролар учун компьютер операторлик курслари борлигини эшитиб ҳайратландик. Бу ерга келиб инсоннинг қанчалик имкониятлари кенг эканлигини амалда кўрдик. Компьютер оламини клавиатуралар орқали ҳис қилиш, идрок қилиш ва унда ишлаш осон иш эмас албатта.

Туман бандлик бўлимидан йўлланма орқали ўқув курсларга қабул қилинган тинловчилар бепул компьютер сабоқларини маҳоратли устозларидан ўрганмоқдалар. Ҳар бир ўқувчига индивидуал ёндошув асосида 2 ой давомида компьютер оператори касби ўқитилади, якунида диплом топширилади. Бу ерда асосан талабалар келиб ўқийди. 

Имконияти чекланган фуқароларга яна бир қулайлик яратиш мақсадида жорий йилдан марказ қошида брайл алифбосида адабиётлар чоп этувчи нашриёт фаолияти йўлга қўйилди. Жамоанинг фаоллиги туфайли “Ташаббусли бюджет”дан кўп овоз олиб, лойиҳа ютиб олинди. Натижада яна бир ижтимоий ташаббус амалга ошириладиган бўлди. 

Жорий йилнинг 4 октябрь куни давлатимиз раҳбарининг “Камбағалликни қисқартириш ва бандлик соҳасида давлат сиёсатини такомиллаштириш ва самарадорликни ошириш чора-тадбирлари тўғрисида”ги қарори қабул қилинди.  Камбағалликни қисқартириш ва бандлик вазирлиги ҳузуридаги “Ишга марҳамат” мономарказлари ва касб-ҳунарга ўқитиш марказлари “Касбий кўникмалар марказлари” сифатида қайта ташкил этилмоқда.  Бунда қарор билан ушбу муассасаларга бир қатор имтиёзлар ҳам бериляпти. Бу эса келгусида касб-ҳунар турларининг кўпайишига замин бўлади. 

<iframe width="650" height="420" src="https://www.youtube.com/embed/suSdzYdxFMo" title="Monomarkazlar qayta tashkil etilmoqda" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Санжар Тошпўлатов, Нишонбой Абдувойитов, Улуғбек Тўхтаев(видео), ЎзА