Минскда Наманган савдо уйлари очилди
Наманганлик етакчи ишбилармонлар томонидан ташкил этилган мазкур савдо уйларининг очилиш маросимида Наманган вилояти ҳокими Шавкат Абдураззоқов ҳамда Минск шаҳар ижро қўмитаси, ҳамкор вазирлик ва идоралар вакиллари, беларуслик ҳамкорлар иштирок этди.
Президентимиз Шавкат Мирзиёевнинг Беларусь Республикасига шу йил июль ойида амалга оширган расмий ташрифи ҳар икки мамлакат ўртасидаги ҳамкорликни ҳудудлараро алоқалар кесимида жадал ривожлантиришга кенг йўл очди. Бу айни кунларда Наманган вилояти делегациясининг Беларусга амалий ташрифи жараёнларида яққол кўзга ташланмоқда.
Маҳаллий ҳокимлик, давлат ташкилотлари ва тадбиркорлик субъектлари вакиллари иборат юртимиз делегацияси олиб бораётган музокаралари натижаси ўлароқ, Беларусь Республикаси пойтахти Минск шаҳрида наманганлик тадбиркорларнинг учта савдо уйи очилди.
Бу жойда “Наманганда ишлаб чиқарилган” белгиси остида текстиль-трикотаж маҳсулотлари савдо кўргазмаси йўлга қўйилди. Жумладан, вилоят саноати алоҳида ўрин тутадиган “Art soft home” компаниясининг экспортбоп маҳсулотлари барчада катта қизиқиш уйғотмоқда.
Ташриф давомида, Наманган делегацияси Беларусь Республикасининг вазирлик ва идоралари мутасаддилари билан учрашувлар ўтказилди.
Жумладан, “Беллегпром” концерни мутасаддилари билан учрашувда енгил саноат йўналишида қўшма инвестиция лойиҳаларини амалга ошириш, замонавий технологияларни жалб этиш ҳамда Наманган текстиль маҳсулотларини Беларусь бозорига экспорт қилиш масалалари муҳокама қилинди.
Қайд этиш жоизки, “Беллегпром” енгил саноат маҳсулотларини ишлаб чиқариш ва реализация қилиш билан шуғулланувчи корхоналарни бирлаштиради. Бирлашма таркибига 60 дан зиёд ташкилотлар кириб, улар тўқимачилик, тикувчилик, трикотаж ва чарм-пойабзал саноати йўналишларига бўлинади.
Бундан ташқари, Беларусь Қишлоқ хўжалиги ва озиқ-овқат вазирлиги, Озиқ-овқат саноати бирлашмаси вакиллари билан мулоқотларда икки томонлама ҳамкорлик алоқаларини ўрнатиш ва уларни янада ривожлантириш муҳокама марказида бўлди.
Наманган вилояти ҳокими Шавкат Абдураззоқов бошчилигидаги делегация аъзолари ташриф мобайнида Беларусь Республикасининг Гродно вилояти ижроия қўмитаси раиси Юрий Караев билан расмий учрашув ўтказилди.
Ўзаро мулоқотда томонларнинг имкониятлари юзасидан фикр-мулоҳаза алмашилиб, қишлоқ хўжалиги, енгил саноат, тадбиркорлик йўналишларида мустаҳкам ҳамкорлик ўрнатиш бўйича келишиб олинди.
Учрашув якуни бўйича Наманган ва Гродно вилоятлари ўртасида икки томонлама ҳамкорлик меморандуми имзоланди.
Наманган делегациясининг Беларусга хизмат сафари давом этмоқда.
Оқилхон Дадабоев, ЎзА
