Манзарали ва мевали кўчатлар экилди
Гулистон туманидаги Аҳиллик маҳалласида 6 гектар ер майдонига 15 мингдан ортиқ манзарали ва мевали кўчат экиш ишлари амалга оширилди. Бу энг катта кўламдаги кузги кўчат экиш тадбири бўлиб, туман ҳокими вазифасини бажарувчи Олимжон Жўраев раҳбарлигида ташкилот ва идоралар раҳбарлари, фаол нуронийлар ҳамда ходимлар иштирокида ўтказилди.
Тадбир давомида экилган кўчатлар келгусида соя-таъсирли дарахтларга айланиши учун ер тайёрланди, дренаж тизими ўрнатилди ва суғориш имкониятлари таъминланди. Мазкур чора-тадбирлар аҳоли учун экологик тоза, соя-салқин ва яшашга қулай муҳит яратишга қаратилган.
— “Яшил макон” умуммиллий лойиҳаси доирасида туман бўйича кузги кўчат экиш мавсуми режалаштирилган тартибда ва ҳар бир тадбир юқори даражада уюшқоқлик билан амалга оширилмоқда. Бу жараёнда ерни тайёрлаш, дренаж тизимини ўрнатиш ва суғориш имкониятларини таъминлаш каби чора-тадбирларга алоҳида эътибор қаратилмоқда. Булар экилган кўчатларнинг мустаҳкам илдиз отиши ва келгусида соя-таъсирли дарахтларга айланиши учун асосий замин яратади. Лойиҳа нафақат кўчалар ва майдонларни обод қилиш, балки аҳолининг ҳаёт сифатини ошириш, болаларимиз учун соғлом ва қулай муҳит яратишга ҳам хизмат қилади, — деди туман ҳокими Олимжон Жўраев.
Туман ҳокимлиги режасига кўра, мазкур ҳудудда кўчатларни мунтазам парвариш қилиш, суғориш ва қўшимча кўкаламзорлаштириш ишлари тизимли олиб борилади.
Куз фасли давомида барпо этилган янги яшил ҳудудлар “Яшил макон” умуммиллий лойиҳаси доирасида аҳолининг ҳаёт сифатини ошириш ва болалар учун соғлом муҳит яратишга хизмат қилади.
Ғулом Примов, ЎзА мухбири
