“Мактаб бозорлари”да нарх-наво қандай? (+видео)
Ёзги таътил якунига етай деб қолган бир паллада мактаб бозори бошланади. Болажонларда мактаб соғинчи, ота-оналарда эса арзонроқ бозорни топиб, фарзандини кийинтириш ташвиши. Хўш, бугун бозорларимизда мактаб қуроллари, кийим-бошлар арзонми? Биз энг зарур бўлган ўқув қуроллари, ўқувчи кийимининг нархини аниқлашга ҳаракат қилиб кўрдик.
“Эски жува деҳқон бозори” АЖ ҳудудидаги мактаб ярмаркалари айнан шу мақсадларга хизмат қилмоқда. Барчамиз фарзандимизга энг яхшисини, кўркам, сифатли кийим, пойабзал, ўқув қуролларини харид қилишни истаймиз. Танлов кенг бўлса, яна ҳамёнбоп бўлса “нур устига аъло нур”.
Бозордаги сотувчилардан билдикки, мактаб ўқувчиларига жами ўқув қуроллари 230-250 минг сўмга тушар экан. Ўқувчи кийимлари: кўйлаги ва шими 250 минг сўм, мактаб сумкалари 130-250 минг сўмгача сотилмоқда. Бунга пойабзал ва ички кийимларини қўшиб ҳисоблаганда ўртача 1 млн сўмга борар-бормас ҳар бир болага сарфланмоқда.
Ўқув мавсуми олдидан нархларнинг сунъий равишда ошиб кетишининг олдини олиш мақсадида масъуллар бириктирилиб, сотувчилар ўртасида тарғибот-ташвиқот ишлари йўлга қўйилган. Бозор маъмурияти мактаб ярмаркаси учун қулай жойларни ажратиб, тадбиркорларга етарлича шарт-шароит яратиб берётир.
Ёзнинг иссиқ кунларида мактаб бозори деб ота-оналар узоқ ҳудудларда сарсон бўлмасликлари учун аҳоли гавжум жойларда мактаб ярмаркалари ташкил этилмоқда. Мақсад ота-оналар фарзандлари билан тиқилинчларда қолиб кетишларининг олдини олиш, ўзларига маъқул бўлган маҳсулотларни яшаш ҳудудларига яқин жойларда, мақбул нархларда сотиб олишларига кўмаклашишдир.
<iframe width="640" height="350" src="https://www.youtube.com/embed/7B2t4uoLvhQ" title="“Maktab bozorlari”da narx-navo qanday?" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Санжар Тошпўлатов, Ойбек Давронов, Улуғбек Тўхтаев, ЎзА
