Республика ёш ижодкорларининг Зомин семинари шўъба машғулотлари сўлим табиатнинг шарқироқ сойлари минг жилғага бўлинган масканларда ўтказилди.
Устоз ижодкорларнинг қимматли фикрлари ҳар бир ёш ижодкор учун фойдали бўлмоқда.
–Айрим ёш ижодкорларда ўзи тушунмаган туйғуларни ифодалаш, насиҳат тарзидаги шеърлар кўзга ташланади, – деди таниқли шоир Азиз Саид. – Ижодкор ўз ёшига мос фикрларни айтиши керак. Сўзлар чиройли бўлиши мумкин, лекин улар энг аввало ижодкорнинг ёшига мос бўлиши керак. Зўрма-зўраки шеърлар яшаб қолмайди.
–Шеърни исталган вазнда, шаклда ёзиш мумкин, – деди адабиётшунос олим Нурбой Жабборов. – Шеърда кучли ҳаёт мантиғи бўлиши, у ҳақиқатга таяниши, китобхонни ишонтира олиши, таъсирлантириши керак. Шеър ҳамма кўриб турган нарсанинг ҳеч ким англамаган жиҳатини ифодалаш демакдир. Бу жуда катта малакани талаб этади. Унинг учун эса тинимсиз мутолаа керак.
[gallery-18138]
–Хорижий давлатлардаги кўплаб адабий фестивалларда иштирок этганмиз, – деди Ўзбекистон Республикасида хизмат кўрсатган маданият ходими Эшқобил Шукур. – Ўзбек шеърияти ниҳоятда илғор шеърият эканини яна бир бор дилдан англаганмиз. Охирги 100 йилги шеърият жуда катта босқични босиб ўтди. Ёшларимиз Миртемир, Ойбек, Шайхзода каби шоирлар ижодини кўпроқ ўрганиши керак. Айниқса, Миртемир ижодида ўзбек тилининг сўз бойлиги жуда ёрқин кўзга ташланади.
–Бугун ёш ижодкорлар учун мисли кўрилмаган шароитлар яратилмоқда, – деди атоқли адиб Ғафур Шермуҳаммад. – Биз ўқиган давр билан ҳозирги даврни ҳатто солиштириб ҳам бўлмайди. Ёшлар бундай имкониятларнинг қадрига етиши керак.
–Таржима ижодкордан икки ҳисса меҳнат, масъулиятни талаб этади, –деди таниқли ижодкор, таржимон Бегойим Холбекова. – Бугун таржима соҳасида ёшлар жуда фаол изланиш олиб бормоқда. Уларнинг айрим ижод намуналарини хорижий давлатларга ҳам юбордик. Таржимонлар турк, инглиз, форс ва бошқа кўплаб тиллардан намуналар устида иш олиб бораётгани диққатга сазовор.
Семинар ўз ишини давом эттирмоқда. Буларнинг бари ёш ижодкорлар учун маҳорат, изланиш, ўз билимларини янада кучайтириш сабоғига айланиши аниқ.
Назокат Усмонова,
Жамшид Ёрбеков (суратлар),
ЎзА