2028 йилнинг 14–30 июль кунлари Лос-Анжелес шаҳрида XXXIV ёзги Олимпия ўйинлари бўлиб ўтади. Айни пайтда ушбу йирик спорт тадбирининг дастурига оид айрим тафсилотлар аниқ бўлмоқда.

Хусусан, Халқаро Олимпия қўмитаси спорт директори Кейт Макконеллнинг маълум қилишича, "Лос-Анжелес-2028" футбол мусобақаларида эркаклар жамоалари учун 12 та, аёллар жамоалари учун эса 16 та квота ажратилган. Бу — 2024 йилда Парижда бўлиб ўтган XXXIII Олимпия ўйинларидаги футбол баҳсларидан фарқ қилади. Ўшанда эркаклар учун 16, аёллар учун эса 12 та жамоа иштирок этган эди.

Эслатиб ўтамиз, "Париж-2024" Олимпиадасида Ўзбекистон тарихида илк бор футбол бўйича терма жамоамиз қатнашган эди. Ўшанда делегациямиз умумий ҳисобда 8 та олтин, 2 та кумуш ва 3 та бронза медални қўлга киритган.

Жавоҳир Тошхўжаев, ЎзА