Хива шаҳрида ташкил этилган II “Лазги” халқаро рақс фестивали миллий рақс санъатимизнинг нақадар бой ва бетакрор эканини яна бир карра намойиш этди. Бу ҳақда фестиваль иштирокчиларининг фикрлари билан қизиқдик.

Султон Раев, "ТУРКСОЙ" халқаро ташкилоти бош котиби:

– Мазкур фестиваль улкан аҳамиятга эга. Хивада ташкил этилган ушбу фестивалнинг жаҳонда ўхшаши йўқ. Бу фестиваль дунё миқёсида катта акс-садо бериши керак, деб ўйлайман. Мен яқиндагина Париж, Женева каби шаҳарларда бўлиб қайтдим. У ерда “Лазги рақси намойиш этилганида одамлар тик туриб олқишлади. Бу рақс ўзбек халқи учун улкан аҳамиятга эга. Негаки, у ўзида халқингизнинг қалби, тарихи, маданиятини акс эттиради. Лазги – ўзбек миллий маданиятининг феномени. 2025 йилдан бошлаб ушбу фестивални туркий тилли давлатларда ҳам ўтказиш таклифини илгари сурдик. Жумладан, бу йўналишда илк халқаро “Лазги” фестивали Туркиянинг Анталия шаҳрида бўлиб ўтиши юзасидан фикр билдирдик. Ўзбекистонда учинчи Ренессансга старт берилиши улкан маданий-маърифий янгиланиш, юксалиш жараёнларини кўзда тутиши билан аҳамиятлидир. 

Озодбек Назарбеков, маданият вазири:

– "ТУРКСОЙ" ташкилоти бош котиби “Лазги” фестивалини 2025 йилдан бошлаб хорижий тилли давлатларда ҳам ўтказиш таклифини билдирди. Бу жуда ажойиб, яхши ташаббус. Бу таклиф рақсларимизни жаҳон миқёсида олиб чиқиш имконини беради. 

Гавҳар Матёқубова, Ўзбекистон халқ артисти:

– Ҳозир лазги рақсига қизиқиш тобора ортиб бормоқда. Бу рақс ЮНЕСКОнинг номоддий маданий мероси рўйхатидан жой олганидан сўнг жаҳон миқёсида ушбу рақсга қизиқиш ва эътибор ҳам кучайди. Бу рақс бўйича доимий онлайн дарслар, машғулотлар ўтказиб борилмоқда. Zoom дастури орқали ушбу рақс бўйича дарслар мунтазам ўтказилмоқда. Ўзбек халқининг рақслари дўстлик, ҳамжиҳатликни янада мустаҳкамлашга хизмат қилмоқда. 

ЎзА мухбири Н.Усмонова тайёрлади.