Куз-қишга тараддуд: дастлаб 220-500 кВ кучланишли электр тармоқлари кўрикдан ўтказилади
"Ўзбекистон МЭТ" АЖ матбуот хизмати хабарига кўра, бугун ўтказилган ишчи тартибдаги видеоселектор йиғилишида 2022-2023 йил куз-қиш мавсумига тайёргарлик ишларини бошлаш юзасидан топшириқлар берилди.
Бу борада берилган кўрсатмаларга биноан мавсумий таъмирлаш-созлаш ишлари дастлаб қўшни республикалар ҳудудидан кесиб ўтган 220-500 кВ кучланишли электр тармоқларини кўрикдан ўтказишдан бошланади.
Уларда аниқланган камчиликларни бартараф этиш, эскирган ускуна ва жиҳозларни янгилаш, таъмирлаш-созлаш, шунингдек, қўшимча тарзда қушлар қўнишидан ҳимоя мосламаларини ўрнатиш, таянч устунларининг мустаҳкамлигини таъминлаш ва бошқа техник-муҳандислик амалиётлари орқали бошланади.
Эслатиб ўтамиз, Ўзбекистоннинг Қозоғистон, Тожикистон, Қирғизистон ва Туркманистон ҳудудидан ўтувчи магистраль электр тармоқлари мавжуд бўлиб, уларнинг барқарор фаолияти мамлакатимиз электр таъминоти ишончлилигини оширишга хизмат қилади.
ЎзА