1919 йил (бундан 102 йил олдин) – Туркистондаги оғир аҳволни ҳисобга олган Қизил Армия бош қўмондонлиги Шарқий фронтнинг жанубий қисмида алоҳида Туркистон фронти ташкил этиш ҳақида қарор қабул қилди ва унга Фрунзе қўмондон этиб тайинланди.
Тарихчи Дилшод Камоловнинг қайд этилишича, Туркистон фронти таркибида Туркфронт ҳарбий трибунали иш бошлади.
1923 йил (бундан 98 йил олдин) – Бухоро республикаси Марказий Ижроия Қўмитаси сессияси томонидан Бухоро Халқ Совет Республикаси Конституциясига аҳолининг маълум гуруҳларини сайлов ҳуқуқидан маҳрум қилувчи ўзгартишлар киритилди. Унга кўра, катта-кичик савдогарлар, собиқ амалдорлар сайлов ҳуқуқидан маҳрум этилди.
1930 йил (бундан 91 йил олдин) – Ўзбекистон халқ артисти Яйра Абдуллаева таваллуд топди (вафоти 2019 йил). У ўзи яратган образларда турли тоифадаги хотин-қизлар ҳаёти, уларнинг қисмати, жасорати ва олижаноблигини мужассамлантирди. Кей (М. Каору, «Ўғирланган умр») образи Яйра Абдуллаева ижодининг чўққиси бўлиб, у япон аёлининг машаққатли ҳаёт йўлини, тақдирини психологик теранлик ва изчиллик билан очиб берди. У овоз, имо-ишора, киноя ва бошқа ифода воситаларидан усталик билан фойдаланди. Яйра Абдуллаева 1998 йилда «Дўстлик» ордени билан тақдирланган.
1937 йил (бундан 84 йил олдин) – шоир, публицист Тавалло «Турон», «аксилинқилобий» «Миллий иттиҳод» ва бошқа ташкилотларнинг аъзоси бўлганликда, «шеърларида миллатчилик ғояларини илгари сурган»ликда айбланиб, қамоққа олинди. У 1937 йил 10 ноябрда НКВД (Ички ишлар халқ комиссарлиги) қошидаги «учлик» ҳукми билан отиб ташланган. Кейинчалик 1968 йил 18 октябрда оқланган.
1959 йил (бундан 62 йил олдин) – Ўзбекистон ҳукуматининг буйруғи билан Тошкент давлат консерваториясида 25 ўринли, Тошкент театр ва рассомчилик институтида 35 ўринли кечки бўлим очилди. Натижада мусиқа олийгоҳларида кечки бўлимларда ҳам мутахассислар тайёрлана бошлади.
1992 йил (бундан 29 йил олдин) – Ўзбекистон Республикаси Украина Республикаси билан дипломатия муносабатларини ўрнатди.
1996 йил (бундан 25 йил олдин) – Ўзбекистон Республикаси Вазирлар Маҳкамасининг «Олимпия шон-шуҳрати музейини ташкил этиш тўғрисида»ги қарори қабул қилинди.
2017 йил (бундан 4 йил олдин) – Ўзбекистон Республикаси Вазирлар Маҳкамасининг «Интернет жаҳон ахборот тармоғида миллий контентни янада ривожлантириш чора-тадбирлари тўғрисида»ги қарори имзоланди.
Алишер ЭГАМБEРДИЕВ тайёрлади