Охирги йилларда мамлакатимиз кўмир маҳсулотларини етказиб бериш механизмини янада такомиллаштириш, белгиланган сифат ҳамда миқдорларда таъминлаш, истеъмолчига етиб бориш жараёнларини тизимли йўлга қўйишга алоҳида эътибор қаратилмоқда.

“Ўзбеккўмир” акциядорлик жамияти эса кўмир қазиб олувчи ва етказиб берувчи йирик ва етакчи ташкилот бўлиб, унинг тасарруфидаги конларда мунтазам равишда самарали иш ташкил қилинган. Хусусан, 1 миллиард 800 минг тонна аниқланган захирага эга “Ангрен” кўмир ҳавзасида фаолият олиб бораётган “Апартак” кўмир кони тарихи 1968 йилдан бошланади.

Тарихга назар солсак, ўшанда собиқ “Средазуголь” ишлаб чиқариш бирлашмаси директори Г.Ибрагимов таклифи билан Ангрен кўмир ҳавзасига “Қизилқум” старательи жамоаси таклиф этилди. Мақсад Ангрен кўмир ҳавзасидан ёқилғи қазиб олишнинг қўшимча қувватларини ишга тушириш бўлган. Бу пайтда Ўзбекистон ва Марказий Осиё ҳудудида олтин қазиб олиш билан шуғулланаётган старательчилар бу вазифани муваффақиятли уддалади. 

“Қизилқум”ни бошқараётган кончи С.Бондаренко катта ташкилотчилик ва тадбиркорлик салоҳиятига эга эди. У икки ой ичида Помирдан зарур кон техникасини олиб келди ва Навгарзон участкасида кон очиш ишларини тезлик билан бошлади. Хайрли иш тезда натижа берди. Конда кейинги йилда 780 минг тонна “қора олтин” қазиб олишга эришилди. Келгуси йилларда кўрсаткичлар 1 миллион тоннага етди.

Аммо, 1997 йилда Навгарзон участкасида катта кўчки юз берди ва бу ерда кон ишларини тўхтатишга тўғри келди. Шу тариқа “Апартак” конида фаолиятни тиклаш таклиф қилинди ва улар мавжуд кон техникасини шу ерга кўчирди. 1998-2000 йилларда “Апартак” конидан 1,2 миллион тонна кўмир қазиб олинди.

2001 йилда “Қизилқум”дан “Ангрен” участкаси ажралиб чиқди ва “Апартак” очиқ акциядорлик жамияти сифатида фаолият кўрсата бошлади. Ушбу жамиятни кончилик соҳасида катта тажрибага эга бўлган геология-минералогия фанлари доктори Ф. Исмоилов бошқарди. 2004 йилда “Апартак” ёпиқ акциядорлик жамиятига айлантирилди ва С.Лебедов раҳбарлигида фаолият олиб борди. 2005 йилда жамият кўмир қазиш билан бирга, уни реализация қилиш ҳуқуқини ҳам қўлга киритди.

Ҳозирги кунда “Апартак” кўмир кони филиали “Ўзбеккўмир” АЖ таркибида фаолият олиб бормоқда. Иккита кўмир карьери ва бешта участкада 370 нафардан кўпроқ киши меҳнат қилмоқда. Филиалда 13 та экскаватор, 4 та бульдозер, 2 та ортиш машинаси, 2 та автогрейдер, 22 та оғир юк ташувчи автосамосвал, 1 та автобус, 2 та автокран, шунингдек, бир неча енгил автомобиль ва конвейер линияси ишлаб турибди. Корхона йилига ўртача 387,5 минг тонна кўмир қазиб чиқариш, 2 миллион 213,4 минг куб метр кўмирнинг устки қатламини очиш қувватига эга.

Сўнгги йилларда кўмир саноатига бўлган эътибор ошиши, техника паркининг янгиланиши натижасида бу ерда кўмир қазиб олиш суръатлари тобора ортмоқда. Жорий йилда “Апартак” конида илк маротаба 1,2 миллион тонна кўмир қазиб олинди. Бу борадаги саъй-ҳаракатлар тизимли давом эттирилади. 

Руслан Исманов,

“Ўзбеккўмир” АЖ “Апартак” кўмир кони филиали директори.

ЎзА