Халқаро ҳамкорликни ривожлантиришнинг муҳим омили
“Ўзэкспомарказ”да “Транспорт ва логистика – TransUzbekistan – 2014” XI халқаро кўргазмаси очилди.
Кўргазма Ўзбекистон Республикаси Ташқи иқтисодий алоқалар, инвестициялар ва савдо вазирлиги, Савдо-саноат палатаси, Ўзбекистон Халқаро автомобилда юк ташувчилар уюшмаси, Халқаро экспедиторлар уюшмаси ва “ITE Uzbekistan” халқаро кўргазма компанияcи ҳамкорлигида ташкил этилди.
Тадбирнинг очилишида Президентимиз Ислом Каримов раҳнамолигида транспорт коммуникациялари ва логистика соҳасида амалга оширилаётган кенг кўламли ислоҳотлар мамлакатимизни жадал ривожлантиришда муҳим омил бўлаётгани алоҳида таъкидланди. Йўл-транспорт коммуникацияларини ривожлантириш мамлакатимизнинг жаҳон бозорига фаол интеграциялашувига, ҳудудлар инфратузилмасини тубдан яхшилашга, халқимиз фаровонлигини юксалтиришга хизмат қилаётир. Давлатимиз раҳбарининг 2010 йил 21 декабрда қабул қилинган “2011-2015 йилларда инфратузилмани, транспорт ва коммуникация қурилишини ривожлантиришни жадаллаштириш тўғрисида”ги қарори бу борада муҳим дастуриламал бўлаётир.
Мамлакатимизда амалга оширилаётган кенг кўламли чора-тадбирлар самарасида ушбу соҳада халқаро ҳамкорликни янада ривожлантириш учун кенг имкониятлар пайдо бўлмоқда. “TransUzbekistan – 2014” халқаро кўргазмасида Ўзбекистон, Хитой, Германия, Италия, Беларусь, Грузия, Бирлашган Араб Амирликлари, Ҳиндистон, Эрон, Латвия, Литва ва Россиядан элликдан зиёд компания иштирок этмоқда.
Болтиқбўйи компаниялари “TransUzbekistan” халқаро кўргазмасида мунтазам иштирок этиб келади. Чунончи, бу йилги кўргазмада Латвия Республикаси Миллий гуруҳининг ўн икки компанияси ўз маҳсулотларини намойиш этаётган бўлса, Литванинг “LINAVA” автомобилда ташувчилар миллий ассоциацияси экспозициясида “Daimanta”, “Svevala”, “Stanvita” компаниялари стендлари ўрин олган.
– Ўзбекистон Осиё минтақасида транспорт коммуникациялари ва логистика соҳасида етакчи ўринлардан бирини эгаллайди, – дейди Латвиянинг “Inflot Worldwide Shipping Agency” компанияcи менежери Андрей Медведев. – Ҳамкорлигимиз ўзаро манфаат ва ишончлилик тамойили асосида йўлга қўйилган. Бу эса мамлакатларимиз ўртасида юк ташиш ҳажмини барқарор ошириш имконини бермоқда.
Мамлакатимиздаги йирик замонавий “Universal Logistics Services” темир йўл контейнер терминали кўргазмада илк бор иштирок этмоқда. Компания контейнер ва вагонлар, шунингдек, ҳажми катта бўлмаган юкларга ишлов бериш бўйича комплекс хизматларни тақдим этади.
Ўзбекистон билан Хитой Халқ Республикаси ўртасидаги савдо муносабатларининг тобора мустаҳкамланиб бораётгани мамлакатларимиз ўртасида транспорт алоқасини ривожлантиришга кўмаклашмоқда. Хитойнинг “Sinochain Logistics” ва “Trans Sea And Railway Logistics Group” компаниялари томонидан таклиф қилинаётган кенг кўламли логистика хизматларига катта қизиқиш билдирилаётгани ҳам бундан далолат беради.
– Транспорт инфратузилмаси ривожланган Ўзбекистон Марказий Осиёдаги энг муҳим ҳамкоримиздир, – дейди “Sinochain Logistics” компанияcининг маркетинг бўйича минтақавий директори Луис Лу. – Ушбу кўргазмада компаниямиз темир йўл логистикаси бўйича хизматларни таклиф қилмоқда. Ўзбекистоннинг марказий қисмини Фарғона водийси билан боғлайдиган янги темир йўл линияси мамлакатларимиз ўртасида транспорт алоқасини ривожлантиришда муҳим омил бўлади. Мазкур лойиҳа Шарқ ва Ғарб ўртасидаги қадимий савдо йўли бўлган Буюк ипак йўлини қайта тиклаш борасида муҳим қадам бўлишига ишонаман.
Ҳиндистоннинг МДҲ давлатларига юк етказиб беришга ихтисослашган “Lark Logistics” компанияcи стенди соҳа мутахассисларида катта қизиқиш уйғотмоқда.
Автомобиль бутловчи қисмлари сектори – “Auto&Parts Uzbekistan” кўргазманинг ўзига хос бўлимидир. Ушбу бўлим экспонентлари орасида Эроннинг шина ишлаб чиқарувчи “Razi Industrial Group” ва Италиянинг автомобилларни таъмирлаш учун кенг турдаги маҳсулотларини намойиш этаётган “Termomeccanica” компанияси кўргазмага ташриф буюрганлар эътиборини тортмоқда.
Дунёнинг турли давлатларидан транспорт, логистика ва юк ташиш соҳасида фаолият юритаётган йирик компанияларни бир жойда тўплаган “TransUzbekistan – 2014” халқаро кўргазмаси мазкур йўналишда халқаро ҳамкорликни ривожлантириш ва янги инвестицияларни жалб қилишда муҳим омил бўлади.