Камондан отиш бўйича Ўзбекистон чемпионати (+видео)
Ўзбекистон Республикаси Миллий гвардияси, Спорт вазирлиги, Камондан отиш федерацияси ҳамкорлигида Наманган шаҳридаги “Баркамол авлод” спорт мажмуасида камондан отиш спорт тури бўйича ўсмирлар ўртасида ўтказилган Ўзбекистон чемпионати якунланди.
Наманган шаҳри мезбонлик қилган камондан отиш спорт тури бўйича Ўзбекистон чемпионатида Қорақалпоғистон Республикаси, Тошкент шаҳри ва барча вилоятлардан 17 ёшгача бўлган 150 нафардан зиёд профессионал ва ҳаваскор спортчилар куч ва имкониятларини яна бир бор синовдан ўтказдилар. Таъкидлаш жоиз, кейинги йилларда юртимизда ёшлар ўртасида ушбу спорт турига қизиқувчилар сони ортиб бормоқда. Наманганда бўлиб ўтган ўсмирлар ва қизлар ўртасидаги беллашувларда ёш камончилар микс ва жамоавий биринчиликда юқори натижаларга эришдилар. Чемпионатнинг тантанали ёпилиш маросимида сўзга чиққанлар, камондан отиш спорт турининг мамлакатимиз ёшлари орасида тобора оммалашиб бораётгани, бу эса келажагимиз ворисларини ватанпарварлик руҳида тарбиялашда муҳим ўрин тутишини алоҳида таъкидладилар. Шундан сўнг, Ўзбекистон Республикаси давлат мадҳияси садолари остида мусобақа байроғи туширилди. Умумжамоа ҳисобида 1-ўрин Фарғона вилояти, 2-ўрин Тошкент шаҳри, 3-ўрин эса Навоий вилояти жамоаларига насиб этди. Барча йўналишларда ғолиб бўлган ва ғалабага ишонч билан интилган спортчилар медаллар, диплом ва эсдалик совғалари билан тақдирландилар.
Спортнинг олимпия ўйинлари таснифига киритилган камондан отиш турини ёшлар ўртасида янада оммалаштириш, янги истеъдодларни кашф этиш ҳамда келгусида халқаро майдонларда юртимиз шарафини ҳимоя қиладиган спортчиларни тайёрлашда бу каби мусобақалар муҳим аҳамиятга эга.
<iframe width="650" height="420" src="https://www.youtube.com/embed/R8uu32EgImA" title="Kamondan otish bo`yicha O`zbekiston chempionati " frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Н. Раҳмонова, С. Обиджонов (монтаж), ЎзА
