Ёшлик – янгиликка интилиш, орзу-умидлар, дадил мақсадлар сари олға қадам ташлаш даври. Бу даврда инсон янгиликлар қилишга, ижоду изланишга мойил бўлади.

Президент, ижод, ихтисослаштирилган, давлат ва нодавлат умумтаълим мактабларининг 5-11-синф ўқувчилари ўртасида ташкил этилган “Ихтирочиликка қадам” танловининг республика босқичида бу жиҳатлар яна бир карра ўзининг ёрқин ифодасини топди. 

Кимдир иқтисодиёт, биров экология, яна кимдир тоғ-кон саноатига оид ўзининг илк лойиҳаларини танловга тақдим этди. Гарчи бу изланишлар мукаммалликдан анча йироқ бўлса-да, улар ўқувчи-ёшларни фикрлашга, ўз устида ишлашга, изланишга ундагани эътиборга моликдир. 

Пойтахтимизда мазкур республика танловининг ёпилиш ҳамда ғолибларни тақдирлаш маросими бўлиб ўтди. 

Тадбир Тошкент шаҳридаги Муҳаммад ал-Хоразмий номидаги ихтисослаштирилган мактабида ўтказилди. 

Танловда энг яхши деб топилган 10 та лойиҳа иши муаллифларига Илм-фанни молиялаштириш ва инновацияларни қўллаб-қувватлаш жамғармаси маблағлари ҳисобидан амалиётга татбиқ этиш учун махсус ваучерлар тақдим этилди. 

Шунингдек, танловда ғолибликни қўлга киритган 1-, 2-, 3-ўрин эгаларига Ихтисослаштирилган таълим муассасалари агентлиги томонидан қимматбаҳо совғалар тақдим этилди. 

Н.Усмонова, ЎзА