Июнь ойида IT-Парк фаолиятида кузатилган ўсиш тенденцияси юртимизда IT-инфратузилманинг изчил ривожланаётганини тасдиқлайди. 58 та янги экспортчи компаниянинг қўшилиши ички IT маҳсулотларимизга хорижий бозорда талаб ошиб бораётганидан далолат беради. Шу билан бирга, 29 та хорижий компаниянинг IT-Паркка кириши Ўзбекистонда яратилган солиқ ва маъмурий енгилликлар, инвестициявий муҳитнинг жозибадорлигига ишонч ортаётганини англатади.
Бу жараён мамлакатнинг “рақамли иқтисодиёт”га ўтиш жараёнини жадаллаштирар экан, бир вақтнинг ўзида маҳаллий кадрлар учун янги имкониятлар эшигини ҳам очади. Демак, IT-Парк нафақат технологик марказ, балки глобал ҳамкорлик ва иқтисодий ўсиш учун катта майдонга айланиб бормоқда.
Жорий йилнинг июнь ойида IT-Парк резиденти мақомини олган 58 та экспортга йўналтирилган компаниянинг 29 таси Индонезия, Туркия, БАА, Руминия, Португалия, Венгрия ва Япония каби давлатларнинг хорижий капитали иштирокидаги компаниялардир.
Янги резидентлар биринчи йилда 1129 та иш ўрни яратишни режалаштирмоқда. Улар орасида дастлабки босқичдаёқ сезиларли экспорт салоҳиятига эга эканини маълум қилаётган компаниялар ҳам бор. Масалан, Бразилиянинг “GUARAQE” компанияси АҚШ бозорларига дастурий маҳсулотларни ишлаб чиқиш, техник қўллаб-қувватлаш ва такомиллаштириш бўйича хизматлар кўрсатишни режалаштирмоқда. Уларнинг биринчи йилдаги режалаштирилган экспорт ҳажми 1,5 миллион долларни ташкил этади.
Португалия ва Венгрия капитали иштирокидаги “RUBY TALENT SOLUTIONS” америкалик мижозлар учун масофавий жамоаларни танлаш ва бошқариш бўйича аутсорсинг хизматларини кўрсатади. Компания 3,1 миллион долларлик хизматлар экспортини режалаштирган.
Руминиянинг “ACCESA” компанияси Германия ва Руминия бозорлари учун дастурий таъминот ишлаб чиқиш, IT-консалтинг ва дизайн хизматларига ихтисослашган. Компания 2,2 миллион долларлик экспорт ва 40 тагача иш ўрни яратишни ният қилмоқда.
Бундан ташқари, “MONT TECH SYSTEMS” (BAA) тожикистонлик мижозлар учун IT-консалтинг хизматларини кўрсатиш ва SAAS хизматларини тақдим этиш билан шуғулланади. Режалаштирилган экспорт ҳажми 8,5 миллион долларни ташкил этади.
2025 йил 30 июнь ҳолатига кўра, хорижий резидент компанияларнинг умумий сони 776 тага (ҳудудларда 206 та), экспортга йўналтирилган компаниялар сони эса 750 тага (шундан 228 таси ҳудудларда) етди.
Янги компанияларнинг IT-Парк резиденти мақомини қўлга киритиши Ўзбекистон ахборот технологиялари соҳасининг барқарор ривожланаётганини ва унинг глобал IT-хаб сифатидаги ўрни тобора мустаҳкамланиб бораётганини тасдиқлайди.
Нигора Раҳмонова,
ЎзА