Андижон шаҳридаги Муҳаммад Юсуф номли ижод мактабида Республика ёш ижодкорларининг анъанавий Зомин семинари минтақавий босқичи бўлиб ўтди.

Семинар очилишида Ўзбекистон Ёзувчилар уюшмаси раисининг ўринбосари, таниқли шоир Ботиржон Эргашев, Андижон вилояти ҳокимлиги котибият мудири Элёрбек Холмирзаев, Ўзбекистон Ёзувчилар уюшмаси Андижон вилоят бўлими раҳбари, шоира Хуршида Ваҳобжон қизи, вилоят Мактабгача ва мактаб таълими бошқармаси бошлиғи Расулжон Каримов сўзга чиқди.  

Тадбирда мамлакатимизда ижодкор ёшларни қўллаб-қувватлаш, уларнинг ўз иқтидор ва ижодий салоҳиятини тўлақонли намоён этиши учун кенг имкониятлар яратиб берилаётганлиги, хусусан, Зомин семинари йиллар давомида кўплаб истеъдодларни кашф этиб келаётган ижод майдонига айланганлиги алоҳида таъкидланди.  

[gallery-11854]

Ўзбекистон Ёзувчилар уюшмаси томонидан анъанавий тарзда ўтказиб келинаётган семинарнинг минтақавий босқичида Андижон, Наманган ва Фарғона вилоятларидан 36 нафар ижодкор ёшлар қатнашди. Адабиётнинг назм, наср, бадиий публицистика, бадиий таржима ҳамда болалар адабиёти йўналишлари бўйича ўзларининг иқтидор ва ижод намуналарини намойиш этди. Устоз адиблар Нурали Қобул, Шаҳодат Исахонова, Фарид Усмон, Зиёвуддин Мансур, Зуҳра Алиева, Дилором Эргашева, Маъмура Зоҳидова, Дилшода Эргашева, Руқия Ғаниева, Восит Аҳмад ҳамда бошқалар бугунги ўзбек адабиёти, ижодкор ёшларнинг иқтидор ва салоҳияти, ижод масъулияти ҳақида гапириб, ёш ижодкорларга оқ йўл тилади. Устоз ижодкорлар иштирокида мушоира ва маҳорат дарслари ўтказилди. Шундан сўнг назм, наср, бадиий публицистика, бадиий таржима, болалар адабиёти йўналишлари бўйича шўъбалар доирасида машғулотлар ташкил этилди. Устоз ижодкорлар ҳар бир йўналиш бўйича иштирокчи ёшларнинг ижод намуналари билан танишиб, улар билан суҳбатлашди, ижодидаги ютуқ ва камчиликлари юзасидан маслаҳат, тавсиялар берди.  

Устозлар хулосасига кўра, энг истеъдодли ёшлар сараланиб, Республика Зомин семинарида қатнашиш учун тавсия этилди. Якунда иштирокчиларга сертификат ҳамда Ўзбекистон Ёзувчилар уюшмаси томонидан нашр этилган китоблар жамланмаси, вилоят ҳокимлигининг эсдалик совғалари топширилди.  

Ф. Убайдуллаев, З. Умрзоқов (сурат), ЎзА