Авваллари ёзнинг жазирама иссиғида пилла парваришлашнинг имкони йўқ эди. Бугунги кунда эса республикамизда йилига 4 маротаба ипак қурти боқиш оммалашди. Иссиқда тут баргида сувнинг буғланиши кузатилади. Қурт боқувчи фермер ва касаначиларга эса кескин об-ҳаво ўзгаришига чидамли зотларни етказиш зарур.

Шу сабабли Ипакчилик илмий-тадқиқот институтида тут ипак қуртининг такрорий боқишга мўлжалланган, иссиққа чидамли зотларини яратиш устида илмий тадқиқотлар олиб борилиб, ижобий натижаларга эришилмоқда.    

Тут ипак қурти одатда доимий ҳароратга эга бўлмаган ҳашарот ҳисобланади. Личинкалар кичик ёшларида 26-27°C ҳарорат ва 75-80 фоиз намлик, катта ёшларида эса 24-25°C ҳарорат ва 65-70 фоиз намлик, улар учун меъёрий муҳит ҳисобланади.    

Яратилган янги такрорий қурт боқишга мослашган, иссиққа чидамли зотлар давлат синовидан ўтказилиш жараёнига тайёр. Синовлар натижаси ижобий баҳоланса, келгуси йилдан кенг миқёсда бу турдаги ипак қуртларини кўпайтириш йўлга қўйилиши режалаштирилмоқда.    

Ипак қуртининг иссиқ иқлимга мос зотлари яратилиши натижасида сифати юқори бўлган пилла олинади ва бир қути ипак қурти ҳисобига ҳосилдорлик 3-4 мавсумда 65-70 килограммга етказилади.  

 

Гулноза Бобоева,  

ЎзА