Ғазо жанубида Яҳё Синвар ўлдирилиши тафсилоти маълум бўлгач, Исроил ҳарбийлари ХАМАС етакчиси ҳаётининг сўнгги дамлари акс этган дрон тасвирини тарқатди. Юзи шарф билан ўралган 62 ёшли Синвар дронга қарата ниманидир улоқтирмоқчи бўлган пайти кадрга муҳрланган.
Исроил Мудофаа кучлари бир йилдан кўпроқ вақт олдин – 7 октябрь куни уюштирилган ҳужум уюштирувчиси деб ҳисобланган Синвар чоршанба куни “йўқ қилингани”ни эълон қилди.
Жанг қандай кечди?
Батафсил маълумот пайдо бўлганда қотиллик мақсадли операция эмас, балки тасодифий тўқнашув натижасида содир бўлгани билинди.
Исроил расмийларига кўра, йил давомида разведка идоралари томонидан овланган ХАМАС етакчиси гуруҳнинг ер ости йўли тизимидан хавфсизроқ жойга ўтишга уринган пайти нишонга олинган. Марҳум турган жойни Тал Ал-Султон ҳудудини тинтув қилаётган пиёда аскарлар топган. Улар айни нуқтада ҳаракатнинг юқори мартабали аъзолари борлигига ишонган.
Ҳарбийлар уч нафар мўлжалдаги шахс бинолар орасида ҳаракатланаётганини кўриб, ўт очган. Натижада отишма бошланиб, Яҳё вайрон бўлган бинога қочиб кирган. Шундан сўнг объектга танк снаряди ва ракета отилган.
Исроил ҳарбийлари вакили контр-адмирал Даниэль Хагари айтишича, нишон шунчаки жангчи сифатида мўлжалга олинган.
Ҳарбийлар вайрон бўлган бинога кириб, уни қурол-яроқ, ўқ ўтказмайдиган кийим ва 40 000 шекел – 10 731,63 доллар билан топган.
– Синварнинг вафоти ДНК тести, жумладан стоматология ёзуви ва бошқа усулдаги текширув ўтказилгандан сўнг ошкор қилинди.
ХАМАС ҳали етакчиси қазосини расман тасдиқламади, бироқ гуруҳ ичидаги манбалар Яҳё ҳақиқатан ўлдирилганини кўрсатувчи белгилар борлигини айтган.
“The New York Times” газетаси иқтибос келтирган тўрт исроиллик ҳарбий зобитга кўра, Синвар минтақада мунтазам операция ўтказаётган ва кутилмаганда унга тўқнаш келиб қолган стажёр отряд раҳбарлари томонидан ўлдирилган.
Пентагон АҚШ қўшинларининг қотилликка алоқаси йўқлигини билдирди.
Ҳарбий ҳаво кучлари матбуот котиби генерал-майор Патрик Райдер “Бу АҚШ кучлари бевосита иштирок этмаган Исроил операцияси” деган.
Марҳум ҳаётининг сўнгги ойларида Исроил разведкасига ўзини кузатиш имконини берувчи телефон ва бошқа алоқа воситаларидан фойдаланишни тўхтатган эди. Унинг сўнгги йигирма йил ичида ХАМАС Ғазо ҳудудида қазган улкан туннеллари тармоғида яширинганига ишонишган. Ваҳоланки, ушбу ер ости йўлларининг кўпи уруш пайти Исроил кучлари томонидан аниқланган.
Исроил ҳарбийлари бошлиғи генерал-лейтенант Герци Халеви айтишича, махсус ов уюштирилиши Синвар “ўзини қочоқдек тутишига сабаб бўлган ва шу боис ҳам уни бир неча бор яшаш жойини ўзгартиришга мажбур қилган”.
Яҳё Синварнинг ўлими ХАМАС учун кучли зарба. Гуруҳ ҳарбий қўмондони Муҳаммад Дейф ҳам 13 июль куни Исроил ҳаво ҳужумида ҳалок бўлган.
М.Пирматова,
ЎзА