Испания Италия билан чегарада назоратни кучайтирди
Испания ҳукумати 8 августдан бошлаб Италиядан келувчи йўловчилар учун аэропорт ва портларда вақтинча чегара назоратини жорий қилди. Мамлакат Ички ишлар вазирлиги мазкур тартиб камида 7 сентябргача амал қилишини таъкидлаган.
Қайд этилишича, янги чора ўтган ҳафта Сеута шаҳрига ноқонуний муҳожирлар оммавий кириб келгандан сўнг Рим томонидан жорий этилган чегара чекловига жавоб сифатида қабул қилинди. Энди Италиядан келаётганларнинг паспорти, фуқаролиги ва визаси текширилади.
Рим эса Мадриднинг чекловни бекор қилиш ҳақидаги чақириғини рад этиб, Испаниядан келувчи учинчи давлат фуқаролари учун Шенген тартибини тўхтатиш чорасини камида 15 августгача сақлаб қолишини маълум қилган.
Маълумотга кўра, ўтган ҳафта Марокашдан ўн минглаб мигрант денгиз ва қуруқлик орқали Испаниянинг Сеута анклавига киришга уринган. Бу Европа Иттифоқининг икки давлати ўртасидаги муносабатни сўнгги йиллардаги энг таранг босқичга кўчирди.
Д.Ҳакимов, ЎзА
