Испания Бош вазири Хитойга тўртинчи ташрифини амалга оширди
Испания Хитой билан савдо-сотиқ кенгайишини қўллаб-қувватлаётган Европадаги асосий давлатлардан бири бўлиб қолаётгани аёнлашмоқда.
“Reuters” хабар беришича, Испания Бош вазири Педро Санчес сўнгги йилларда Хитойга тўрт марта ташриф буюрди ва шу орқали АҚШ Президенти Дональд Трампни ғазаблантираётган мустақил ташқи сиёсат йўналишини давом эттириш истагини намойиш этди. Мақолада Мадрид Пекинни иқтисодий ва геосиёсий рақиб эмас, балки стратегик шерик сифатида кўриши таъкидланган.
Санчеснинг сўнгги сафари ҳам у Вашингтон чизиғига эргашишни истамаслигини тасдиқлайди. Америка етакчиси Мадридни Эрон билан уруш пайти АҚШ ҳарбий самолётларига ўз ҳудудига қўниш ҳуқуқини беришдан бош тортгани, шунингдек Испаниянинг мудофаа тизимига йўналтираётган маблағи камлиги учун бир неча бор танқид қилган. Бундан ташқари, Оқ уй раҳбари НАТО таркибидаги етарли садоқат намойиш этмаётган иттифоқчиларга қарши эҳтимолий чоралар билан таҳдид қилган. Бинобарин, агентлик Санчеснинг сиёсати Испания сайловчилари томонидан қўллаб-қувватланаётгани, шу билан бирга АҚШ маъмурияти билан муносабат кескинлашуви мамлакатга қимматга тушиши мумкинлигидан қўрқаётган бизнес вакиллари ва мухолифат орасида хавотир уйғотаётганига урғу берган.
Дарвоқе, хитойлик расмийлар билан кечган мулоқотда Чин мамлакати урушни тугатиш учун Эрон ва Россияга таъсир ўтказишга чақирилган. Зеро, Испания Бош вазири Хитой Украина ва Яқин Шарқдаги ҳарбий ҳаракатга чек қўйишда муҳимроқ ўрин эгаллаши мумкинлигига ишонади. Шу боис, Хитойга ташрифи чоғида у Пекинни глобал можароларга чек қўйиш учун ўз таъсир кучидан фойдаланишга даъват этган.
– Хитой кўпроқ иш қилиши мумкин, – деди Педро Санчес ХХР пойтахтидаги нутқида. – Масалан, худди аввалгидек, халқаро ҳуқуққа ҳурмат кўрсатишни талаб қилиб, Ливан, Эрон, Ғазо, Ғарбий Соҳил ва Украинадаги можароларга чек қўйишда саъй-ҳаракати, салоҳиятини кўрсатиш керак.
С.Раҳимов, ЎзА
