Ислом цивилизацияси маркази – Хитой делегацияси эътиборида
Хитой Халқ Республикаси Давлат кенгаши Бош вазири Ли Цян 17-18 октябрь кунлари расмий ташриф билан Ўзбекистонда бўлди.
Ташриф дастурига кўра юқори мартабали меҳмон “Янги Ўзбекистон” боғидаги Мустақиллик монументи пойига гулчамбар қўйди.
Шундан сўнг олий ва юқори даражадаги музокараларда иштирок этиб, икки мамлакат ўртасидаги янги даврнинг барча шароитларида ҳар томонлама стратегик шериклик муносабатларини янада мустаҳкамлаш масалалари кўриб чиқилди, икки томонлама ҳужжатлар имзоланди.
Юқори мартабали меҳмон бошчилигидаги расмий вакиллар Тошкентдаги Ислом цивилизацияси марказига ташриф буюрди.
Меҳмонларга марказнинг фаолияти, унинг илмий-маърифий йўналишлари ҳамда Ўзбекистоннинг ислом илм-фани ва жаҳон тамаддуни ривожига қўшган ҳиссасини халқаро миқёсда ёритиш борасидаги ишлар ҳақида маълумот берилди.
Ташриф якунида Хитой Бош вазири марказда эсдалик ёзувини қолдирди. Унда цивилизациялар ўртасидаги ўзаро бойишни мустаҳкамлаш ва авлодлар дўстлигини давом эттириш ғояси ифодаланди.
Шу билан ХХР Давлат кенгаши Бош вазири Ли Цяннинг Ўзбекистонга ташрифи якунланди.
“Тошкент-Ҳумо” халқаро аэропортида юқори мартабали меҳмонни Ўзбекистон Республикаси Бош вазири Абдулла Арипов ҳамда бошқа расмийлар кузатиб қўйди.
Абдулазиз РУСТАМОВ, Мусулмон ЗИЁ,
Носиржон ҲАЙДАРОВ, Отабек МИРСОАТОВ, (сурат),
ЎзА
