Жорий йил 15 май куни “Ҳудудларда ёшларга рақамли технологиялар ва хорижий тилларни ўрганиш учун қўшимча шароитлар яратишга қаратилган “IТ-шаҳарча”лар фаолиятини ташкил этиш тўғрисида”ги Президент қарори қабул қилинди.
Қарорга кўра, ҳудудларда ёшларни рақамли технологиялар ва хорижий тилларга ўқитишга йўналтирилган “IT-шаҳарча”лар ташкил этилади.
Ёшларни рақамли технологиялар соҳасига йўналтириш, уларнинг мазкур соҳада билим эгаллаши бўйича интилишлари рағбатлантирилади.
Семинарлар, менторлик дастурлари ва онлайн таълим ресурслари орқали ёшларда рақамли технологиялар соҳасидаги кўникмаларни шакллантириш ва ривожлантириш рағбатлантирилади.
Дастурлаш ва рақамли технологиялардан фойдаланган ҳолда хизматлар кўрсатиш йўналишларида таълим бериш, хорижий тиллар, шу жумладан инглиз тилига ўқитиш орқали ёшларнинг билим ва салоҳиятини ошириш кўзда тутилган.
Ёш авлодни замонавий касбларга ўқитиш, шунингдек, уларда табиий ресурслардан оқилона фойдаланиш кўникмалари оширилади.
Ш.Маматуропова, ЎзА