Андижон вилоятида айни кунда 9 нафар Иккинчи жаҳон уруши қатнашчиси эл-юрт ардоғида ҳаёт кечирмоқда. Улардан бири олтинкўллик Хўжамберди ота Турғуновдир.

Кўксини турли ордену медаллар безаб турган Хўжамберди ота Иккинчи жаҳон уруши йилларида ҳам немис-фашист босқинчиларига, ҳам япон милитаристларига қарши жангларда қатнашиб, мардлик, жасорат намуналарини кўрсатган ўзбек ўғлонларидан бири.

Хўжамберди ота учун 9 май санаси қўшалоқ байрам. Шу куни у  Ғалаба байрами билан бирга таваллуд кунини ҳам нишонлайди. У 1-Белоруссия фронти таркибидаги ҳарбий қисмлардан бирида ўқчи-снайпер бўлиб жангга кирган.

Суронли уруш йиллари ўқчи-снайперчи Хўжамберди Турғуновнинг нафақат қалбида, балки жисмида ҳам ўчмас изларини қолдирган. У аёвсиз жангларда 11 маротаба яраланди, бир оёғидан ажралди. Қайта-қайта жанг майдонларига кириб, Буюк ғалабани Берлинда нишонлаш, сўнг япон урушида қатнашиб, узоқ Шарқдан зафар билан она юртга қайтиш  мўъжизадан ўзга нарса эмас.

-  1942 йилнинг декабрида урушга “повястка” келган, - дейди ота ўша йилларни хотирлаб. – Дастлаб Россиянинг Саратов вилоятидаги Пугачев шаҳрида бир ойлик тайёргарликдан ўтдик. У ерларнинг қиши совуқ бўлар экан, анча қийналдик.

Бир неча сафдошларим билан снайперлар ротасига қўшилдик. Ротамиз аскарларини бўлиб юборарди, турли қисм аскарлари билан бирга юриб, уларга снайпер сифатида кўмак берар эдик. Сталинград шаҳрида илк бор жангга кирдик. Уруш қийинчилиги, даҳшатлари, айниқса, душманнинг вахшийлигидан дастлаб саросимага тушдим. Сафдошларим бирин-кетин халок бўларди. Урушда ҳаловат ва тинчлик деган сўзларга ўрин йўқ эди. Уруш даҳшатлар қўрқинчли тушга ўхшарди.  Ушбу жанг Ватан озодлиги учун ор-номус жанги эканлигини, энди ортга қайтиш учун йўл йўқлигини англадим. Ўзимни қўлга олиб, ҳаёт учун курашиш кераклигини англадим, “Бир бошга бир ўлим” дея қўрқувни қалбимдан чиқариб ташладим.

Айни кучга тўлган, моҳир снайпер Хўжамберди Турғунов жангларда мардлик, жасорат намуналарини кўрсатиб, кўплаб душманни ер тишлатди. У Россия, Украина, Белорусь, Польша, Эстония давлатларининг қишлоқ ва шаҳарларини душмандан озод этишда иштирок этди.

- Ғалабани Берлинда кутиб олганмиз, дейди Хўжамберди ота. – Бир неча кун дам олганимиздан сўнг қисмимиз темир йўл орқали Узоқ Шарққа юборилди. У ерда бир неча ой японларга қарши курашдик. Яратганга беадад шукрлар бўлсин, йиллар давомидаги жангу жадаллардан омон чиқиб, она юртга қайтиш насиб этди.

Жангларда кўрсатган жасорати учун Хўжамберди Турғунов кўплаб орден ва медаллар билан мукофотланган. Ота урушдан кейин узоқ йиллар юртимиз равнақи йўлида самарали меҳнат қилди, ўғил-қизларни тарбиялаб камолга етказди.

Бу йил ўзининг 98 ёшини нишонлайдиган, фарзанд ва набиралари, эл-юрт ардоғида яшаб, юртимиз тинчлиги, тўкин ва фаровон ҳаётимиз учун дуо қилиб яшаётган, умр йўллари ёш авлод учун ибрат намунаси бўлган Хўжамберди ота сингари пиру бадавлат отахонларга давлатимиз томонидан ҳам юксак эҳтиром кўрсатилмоқда.

Юртимизда кенг нишонланаётган Хотира ва Қадрлаш куни, қолаверса, Иккинчи жаҳон урушида фашизм устидан қозонилган ғалабанинг 77 йиллиги арафасида Андижон вилояти ҳокими Шуҳратбек Абдураҳмонов Иккинчи жаҳон уруши қатнашчиси Хўжамберди ота Турғунов хонадонида бўлиб, Президентимизнинг уруш фахрийларига йўллаган байрам табригини ўқиб эшиттиришди ҳамда 15 миллион сўм миқдорида пул мукофоти ва бошқа совғаларни топширди.

Эътибор ва эҳтиромдан мамнун бўлган отахон юртимиз тинчлиги, халқимиз фаровонлигини тилаб дуо қилди.

Ф. УБАЙДУЛЛАЕВ,
З. УМУРЗОҚОВ (сурат), ЎзА