Тошкент шаҳар суди жиноят ишлари бўйича судлов ҳайъати апелляция инстанциясининг навбатдаги суд мажлисида судья О.Муҳаммадиев томонидан транспорт воситасини бошқариш билан боғлиқ маъмурий иш кўриб чиқилди.

Гап шундаки, жиноят ишлари бўйича Учтепа тумани судининг 2024 йил 28 мартдаги қарорига кўра, ҳуқуқбузар А.Б. Маъмурий жавобгарлик тўғрисидаги кодекс (МЖтК)нинг 176-3-моддаси (автомобиль транспортида йўловчилар ташиш фаолияти билан лицензиясиз шуғулланиш)да назарда тутилган ҳуқуқбузарликни содир қилган деб топилган. Унга МЖтК 33-моддаси (енгилроқ маъмурий жазо чорасининг қўлланилиши)ни қўллаб, базавий ҳисоблаш миқдорининг 5 баравари миқдорида, яъни 1 миллион 700 минг сўм жарима жазоси тайинланган. 

Суд қарорига кўра, Транспорт вазирлиги ҳузуридаги инспекция ходимлари томонидан А.Б. ўз бошқарувидаги транспорт воситасида йўловчи ташиш фаолияти билан шуғулланиш учун лицензияси бўлмай туриб, 5 нафар йўловчининг ҳар биридан 3 минг сўм йўл ҳақи олиш эвазига олиб кетаётгани аниқланган. 

Апелляция шикоятида суриштирув ва биринчи инстанция суди муҳокамаси тўлиқ ўтказилмасдан унга асоссиз жарима қўлланилганлигига оид важлар келтирилган. 

Апелляция инстанциясида шикоятда келтирилган важларни ҳамда унга иловаларни иш ҳужжатлари асосида ўрганилиб, унинг ҳуқуқбузарлик оқибатларини қонунда белгиланган 30 кунлик муддатда ихтиёрий равишда бартараф қилгани, яъни ўзини-ўзи банд қилган шахс сифатида давлат рўйхатидан ўтиб, транспорт воситасида йўловчиларни шаҳар, шаҳар атрофида ва шаҳарлараро ташиш учун лицензия варақаси расмийлаштиргани, унинг муқаддам шу каби ҳуқуқбузарликни содир қилмаганини аниқлади. 

МЖтКнинг 271-моддаси 11-бандида, «МЖтК 176-3-моддасида назарда тутилган ҳуқуқбузарликни биринчи марта содир этган тадбиркорлик субъектининг мансабдор шахслари ёки ходимлари ёхуд тадбиркорлик фаолияти билан шуғулланувчи фуқаролар йўл қўйилган қонунбузилишларни ҳуқуқбузарлик аниқланган пайтдан эътиборан ўттиз кунлик муддатда ихтиёрий равишда бартараф этган ва (ёки) етказилган моддий зарарнинг ўрнини қоплаган бўлса, маъмурий ҳуқуқбузарлик тўғрисидаги ишларни юритишни бошлаш мумкин эмас, бошланган иш эса тугатилиши лозим», деб кўрсатилган. 

Шунга асосан апелляция инстанцияси суди ҳуқуқбузарлик ўттиз кунлик муддатда ихтиёрий равишда бартараф этилганлиги сабабли суд қарорини бекор қилиб, маъмурий ҳуқуқбузарликка оид ишни МЖтК 271-моддаси 11-бандига асосан тугатишни белгилади. 

Н.Абдураимова, ЎзА