ФОТОРЕПОРТАЖ

Жиззах вилояти Шароф Рашидов туманида ДХХ Чегара қўшинларига қарашли ҳарбий қисм дала майдонида миллий этноспорт турнири - от пойгаси бўлиб ўтди.

Ушбу беллашувда Мудофаа вазирлиги, ДХХ Чегара қўшинлари, Миллий гвардия ва Божхона қўмитасидан ташкил топган жамоалар чавандозлик маҳоратларини синовдан ўтказди.

Дастлаб 800 метрли пойгада 1- ва 2-ўринни “Латос” ва “Лимон” лақабли хизмат отлари билан иштирок этган ДХХ Чегара қўшинларининг III даражали сержанти Рафиқжон Зокиржонов ҳамда II даражали сержант Улуғбек Авазов эгаллади. 3-ўрин эса “Тумор” лақабли тулпор билан майдонга тушган Мудофаа вазирлиги ҳарбий хизматчиси Оғабек Ўроловга насиб этди. 

[gallery-20216]

Худди шундай, минг метр масофага отда чопишда ҳам чегарачилар рақибларга нисбатан ўз устунлигини кўрсатди. Фахрли 1-ўринни “Қибрай” лақабли от билан ҳарбий хизматчи Маъруф Тоғаев, 2-ўринни III даражали сержант Аҳрор Суяров “Сазан” оти билан қўлга киритди. 1 минг 200 метрли пойгада эса Мудофаа вазирлигининг маҳоратли чавандози Оғабек Ўролов бу сафар “Ракета” лақабли тулпори билан биринчи бўлиб марра чизиғини кесиб ўтди. 

Энг узун – 1 минг 400 метр масофада кечган беллашувда Чегара қўшинлари ҳарбий хизматчиси биринчи, Мудофаа вазирлиги ҳарбий хизматчиси иккинчи ҳамда Миллий гвардия жамоаси вакили фахрли учинчи ўринни забт этди.

Умумжамоа ҳисобида 1-ўринни ДХХ Чегара қўшинлари эгаллаган бўлса, 2- ва 3- ўринларни Мудофаа вазирлиги ҳамда Миллий гвардия жамоалари қўлга киритди. 

Жамшид ЁРБЕКОВ (сурат), ЎзА