Сиёсий партияларнинг жорий йил 27 октябрда Ўзбекистон Республикаси Олий Мажлиси Қонунчилик палатаси ва халқ депутатлари маҳаллий Кенгашлари учун бўлиб ўтадиган сайловларда иштирок этиш учун сайловчиларни қўллаб-қувватловчи имзолар йиғиш тадбирлари ўз ниҳоясига етмоқда.

Бунда юртдошларимиз кутилаётган сайловларда иштирок этишини муҳим деб билган сиёсий партияларни қўллаб-қувватлаб имзо топширди. Хусусан, Ўзбекистон Экологик партиясининг янги таклифлар билан кутилаётган сайловларда муносиб иштирок этиши ва ҳаётий мақсадларини тўлиғича амалга оширишига ишонч билдириб, турли ижтимоий қатлам вакиллари, нуронийлар, хотин-қизлар ва ёшлар ўз хоҳиш-истаклари билан қўллаб-қувватловчи имзоларни топширди.  

Партиянинг Тошкент вилояти Кенгаши томонидан ташкил этилган 38 та имзо йиғиш пунктларида жами 3 минг 510 нафар юртдошимизнинг қўллаб-қувватловчи имзолари йиғилди. Ўтказилган имзо йиғиш тадбирлари партия аъзолари сафига қўшилиш истагида бўлганларни аъзоликка қабул қилиш учун катта имконият бўлди. Имзо йиғиш пунктларида юртининг турли нуқталарида кузатилаётган экологик муаммолар, жумладан, атмосфера ҳавосининг ифлосланиши, табиий захираларнинг камайиши ва чўлланишнинг кенгайиши каби муаммоларга қарши курашиш борасида амалга оширилаётган ва олиб борилиши зарур бўлган чора тадбирлар бўйича очиқ, дўстона руҳда мулоқотлар ўтказилди.  

Хусусан, экологик ҳуқуқбузарликларга қарши курашишда жамоатчиликнинг фаол иштироки муҳим аҳамият касб этиши ҳақида сўз юритилди. Бир қатор юртдошларимиз имзо йиғиш пунктларининг ўзида партия аъзолигига қабул қилинди. Албатта, бу жараёнларда жойлардаги БПТ раислари, партия фаоллари, депутатлар, партиянинг “Аёллар ва Ёшлар қаноти” атрофида бирлашган фаол аъзоларнинг ҳамжиҳатликда олиб борган саъй-ҳаракатлари муҳим аҳамият касб этди.  

А.Мусаев,ЎзА.