Польша 7 июлдан бошлаб Германия билан чегара ҳудудида доимий чегара назоратини жорий этди. Тегишли чора камида 5 августга қадар амал қилади. Ҳозирда 52 та назорат-ўтказиш пунктида танлаб текшириш ўтказилмоқда. Польша яқин орада Литва билан чегарада ҳам шундай чораларни қўлламоқчи.
Чеченистондан Украинадаги урушда иштирок этиш учун 60 344 нафар жангчи юборилган. Бу ҳақда республика раҳбари Рамзан Қодиров маълум қилди. Урушга юборилганларнинг 22 064 нафари кўнгиллилардир, айни пайтда жанговар ҳаракатлар зонасида 13 минг жангчи бор. Қодиров 7 май куни Россия президенти билан учрашувда уруш бошланганидан бери Чеченистондан 55,5 минг жангчи, жумладан, 21,6 минг кўнгилли юборилганини айтганди.
Эрон президенти Исроил махсус хизматлари томонидан унга қарши уюштирилган муваффақиятсиз суиқасд ҳақида маълум қилди. Бу ҳақда у америкалик журналист Такер Карлсонга берган интервьюсида маълумот берди. Пезешкиённинг сўзларига кўра, қотилликка уриниш Эрон раҳбариятининг бошқа юқори мартабали вакиллари билан учрашув пайтида содир бўлган. Исроил учрашув ўтказилаётган жойга зарба беришга уринган. Сиёсатчи Қўшма Штатларни бу воқеага алоқадор эмас деб ҳисоблайди.
Италиянинг Милан шаҳридаги Бергамо аэропортида самолёт двигателига кириб кетган эркак вафот этди. Учоқ 8 июль куни Испаниянинг Астурия шаҳрига учишга тайёргарлик кўраётган бўлган. Самолёт учиш-қўниш йўлагига чиққан пайтда номаълум шахс югуриб келиб, ҳаракатдаги двигателга яқинлашган ва унинг ичига тортилиб кетган. Фожиа самолёт ҳали ҳавога кўтарилмасидан аввал рўй берган.
Биткоин нархи 9-июль куни 112 минг доллардан ошиб, янги рекорд ўрнатди. Бу инвесторларнинг хатарли активларга бўлган глобал талабининг ўсиши сабаб юзага келди. Рекорд қайд этилишига биткоин дефицитининг 200 миллион долларлик ликвидацияси асосий туртки бўлган. Биткоиннинг нархи 9-июл куни сўнгги ҳафта давомида 5,95 фоизга кўтарилиб, биринчи марта тарихдаги энг юқори кўрсаткич — 112 минг доллардан ошган. Binance ва Conibace платформаларида қайд этилган ушбу коърсаткич криптовалюта бозоридаги энг юқори нарх сифатида қаралмоқда.
Украина президенти Владимир Зеленский Россия армияси кунига мингта дрон учиришга тайёрланаётганини айтди. Бу ҳақда у Римдаги Украинани тиклаш бўйича конференцияда маълум қилди. Зеленскийнинг айтишича, Россиянинг асосий мақсади — узоқ давом этувчи ҳаво тревогалари орқали Украина жамиятида ваҳима ва беқарорлик уйғотишдир. Бироқ Украина бу таҳдидларга қарши самарали воситаларга эга ва ҳужумларга муносиб жавоб қайтаради.
<iframe width="650" height="420" src="https://www.youtube.com/embed/zqgXyuY-53Q" title="HAFTA DAYJESTI" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Ирода Жўраева, Улуғбек Тўхтаев, ЎзА