Россия президенти Владимир Путин Украинадаги можарони ҳал қилиш бўйича музокараларни чўзиб, бу орада фронтда янги ҳужумга тайёргарлик кўрмоқда. Бу ҳақда вазиятдан хабардор одамлар Bloomberg агентлигига хабар берди. Европа давлатлари ва Украина прогнозларига кўра, Россия армияси Покровск атрофида йирик ҳужум бошлаши мумкин. Рус қўшинлари бу шаҳарни бир йилдан ортиқ вақт давомида эгаллай олмаяпти. Ўтган ҳафта ўтказилган Украина бўйича музокараларда Германия ва Франция расмийлари Россиянинг Покровск яқинида куч тўплаётганини муҳокама қилган. 29 август куни эса президент Владимир Зеленский Россия бу ҳудудга 100 минг аскар юборганини маълум қилди.

Нигерияда 2 сентябрь куни юздан ортиқ йўловчини олиб кетаётган қайиқ ағдарилиб кетди. Оқибатида 60 киши ҳалок бўлди. Бу ҳақда Al Jazeera хабар берди. Фожиа сешанба куни, маҳаллий вақт билан соат 11:00 атрофида содир бўлган. Қайиқ Тунган Суле шаҳридан Дугга қишлоғига кетаётган бўлган. Фавқулодда вазиятлар агентлиги маълумотларига кўра, қайиқ сув остидаги дарахт тўнкасига урилган ва оғир юк сабабли ағдарилиб, чўкиб кетган. Қайиқда асосан аёллар ва болалар бўлиб, улар Дуггага таъзия билдириш учун йўл олган эди.

Мексикадаги ҳайвонот боғида йўлбарс режалаштирилган кўрик вақтида ветеринарга ҳужум қилди. Бу ҳақда Daily Mail хабар берди. Ҳодиса Халиско штатининг Мазамитла шаҳрида жойлашган ҳайвонот боғида юз берган. Воқеа акс этган видео ижтимоий тармоқларда тарқалган. Унда ветеринар Александра Мора йиртқични кўздан кечираётганда, йўлбарс тўсатдан унга ташланиб, аёлнинг курткасидан ушлагани ва тишларини бўйнига санчмоқчи бўлгани кўринади.

Россия президенти Владимир Путин босиб олинган ҳудудлардан янги ҳужумлар учун трамплин сифатида фойдаланмоқда, шу сабабли Украина ҳудудий ён беришга рози эмас. Бу ҳақда президент Владимир Зеленский Le Point нашрига берган интервьюсида маълум қилди. Зеленскийнинг сўзларига кўра, баъзи оммавий ахборот воситалари украиналик аскарлар шарқий ҳудудларни тарк этганида тинчлик ўрнатилган бўларди, деб ёзмоқда. Украина президенти бу ҳақиқатдан йироқ эканини айтди. У 2014 йил босиб олинган Қримни мисол қилиб келтирди. Мазкур босқин Россияга 2022 йил Украина жанубини эгаллашда трамплин вазифасини ўтаган.

АҚШ федерал суди Google компаниясини фойдаланувчиларнинг махфийлигини бузганликда айблаб, 425 миллион доллар жаримага тортди. Бу ҳақда BBC хабар берди. Суднинг аниқлашича, фойдаланувчилар шахсий маълумотлар кузатуви функциясини ўчирган бўлса ҳам, Google маълумотларни йиғишда давом этган. Даъво 2020 йилда берилган бўлиб, тахминан 98 миллион фойдаланувчи ва 174 миллион қурилмага тааллуқли. Дастлаб, даъвогар томон 31 миллиард доллардан ортиқ компенсация талаб қилган эди.

<iframe width="650" height="420" src="https://www.youtube.com/embed/9840w8z7FZ8" title="Xalqaro dayjest" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Ирода Жўраева, Улуғбек Тўхтаев, ЎзА