Афғонистонда 1-сентябр куни содир бўлган зилзила қурбонлари сони 1124 кишига етди. Бу ҳақда Қизил ярим ой жамиятининг гуманитар гуруҳи хабар берди. Табиий офатда камида 3251 киши жароҳат олган, 8 мингдан ортиқ уй вайрон бўлган. Қутқарув гуруҳлари шарқий тоғли ҳудудларда қидирув ишларини давом эттирмоқда. Ярадорлар Кунар шаҳридан Нангарҳор вилоятига вертолётлар орқали эвакуация қилинмоқда. Йўллардаги вайронагарчилик сабабли айрим ҳудудларга қутқарувчилар ҳануз етиб бормаган.
Буюк Британияда 1884-йилдан бери энг иссиқ ёз қайд этилди. Иқлим ўзгариши туфайли келажакда аномал иссиқлик тез-тез кузатилиши мумкин. Бу ҳақда Reuters хабар берди. Мамлакатда ёз фаслида тўртта иссиқлик тўлқини қайд этилди. Июнь, июль ва август ойларида ўртача ҳарорат 16,1 даража Цельсий бўлди, бу 2018-йилдаги 15,76 даражани ортда қолдирди.
Финляндиянинг Микели шаҳрида НАТО қуруқлик қўшинлари минтақавий қўмондонлиги штаби расман иш бошлади. Бу ҳақда мамлакатнинг қуруқлик қўшинлари ўз расмий сайтида эълон қилди. Шаҳар Россия чегарасидан атиги 140 километр, Санкт-Петербургдан эса 304 километр узоқликда жойлашган. Аввалроқ Россияга энг яқин НАТО қўмондонлиги штаби Полшанинг Шчецин шаҳри эди. У Калининграддан 414 километр узоқликда жойлашган.
Суданнинг Марра тоғларида жойлашган қишлоқда юз берган шиддатли кўчки оқибатида мингдан ортиқ одам ҳалок бўлди. Бу ҳақда Ғарбий Судан минтақасини назорат қилаётган Озодлик каракати 2 сентябр куни баёнот берди. Маълум қилинишича, табиий офат 31 август куни, ҳудудда бир неча кун давом этган кучли ёмғирлар оқибатида юз берган. Ҳаракат етакчиси Абдулваҳид Муҳаммад Нур кўчки қишлоқни бутунлай ер билан яксон қилгани, фақат 1 нафар одам тирик қолганини билдирган. Судан озодлик ҳаракати Бирлашган Миллатлар Ташкилоти ҳамда халқаро гуманитар ташкилотларга мурожаат қилиб, ҳалок бўлганларнинг жасадларини кўчки остидан олиб чиқишда ёрдам сўрамоқда.
Европа комиссияси раҳбари Урсула фон дер Ляен 31-август куни Болгарияга қўнишга уринаётганда GPS навигация билан боғлиқ муаммоларга дуч келди. Бу ҳақда комиссия вакили SNN телеканалига маълум қилди. Еврокомиссия Болгария расмийларидан “буни Россия амалга оширган бўлиши мумкин” деган маълумот олган. Кремл эса бу айбловни рад этмоқда. Урсула фон дер Ляен бўлган самолёт хавфсиз қўнишни амалга оширган, учувчилар самолётни қоғоз хариталар ёрдамида қўндирган.
<iframe width="650" height="420" src="https://www.youtube.com/embed/SVpd6_5mD5E" title="Xalqaro dayjest" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Ирода Жўраева, Улуғбек Тўхтаев, ЎзА