“Ҳизбуллоҳ” Ливан ҳукуматининг қурол-яроғ устидан давлат монополиясини ўрнатиш қарорини рад этиб, қуролсизланиш талабини тан олмади. Бу ҳақда BBC хабар берди. Ҳаракат Ливан ҳукуматининг бу қарорига 6 август куни “Биз бу қарорни гўёки бўлмагандек қабул қиламиз. Бу катта гуноҳга тенг” дея муносабат билдирган.

Жанубий Африкада буқа америкалик миллионер Эшер Уоткинсни ов сафари пайтида шохлаб ўлдирди. Бу ҳақда New York Post хабар берди. Воқеа Лимпопо вилоятида содир бўлган. 52 ёшли миллионер оғирлиги қарийб 1,5 тонна бўлган буқани отмоқчи бўлган. Бироқ тўсатдан ҳайвон ҳужум қилиши оқибатида ҳалок бўлган. Буқа кутилмаганда катта тезликда эркак томон ташланиб, шохлари билан бир зарбада уни ўлдирган.

АҚШ президенти Дональд Трамп Россия раҳбари Владимир Путин билан келаси ҳафтада учрашиши мумкинлигини билдирди. Унга кўра, учрашувда Украинадаги урушини тугатиш масаласи кўриб чиқилади. Бу ҳақда CNN хабар берди. Трампнинг билдиришича, Путин билан АҚШнинг махсус вакили Стив Виткоф ўртасидаги Москвада бўлган учрашув самарали бўлган, бироқ аниқ ютуқларга эришилмаган. АҚШ давлат котиби Марко Рубио ушбу учрашувдан сўнг Россиянинг тинчлик сулҳи учун қандай шартлари борлигини янада аниқроқ тушунганини билдирган.

Ғазонинг ҲАМАС ҳаракати томонидан 2023 йил 7 октябрь куни Исроилга амалга оширилган ҳужумда омон қолганлар ва ҳалок бўлганларнинг қариндошлари Meta компаниясини судга берди. Бу ҳақда Arab News хабар берди. Даъво қилинишича, компаниянинг Instagram ва Facebook ижтимоий тармоқлари ўша кунги ҳужумни жонли эфирга узатган. Бу даъво Тель-Авив округ судига топширилган бўлиб, унда тармоқлар “зўравонликни жонли эфирда намойиш этиш воситасига айлангани” учун айбланмоқда. Жавобгар сифатида тилга олинган Meta’дан тахминан 1,17 миллиард доллар миқдорида товон пули талаб қилинган.

АҚШнинг Пенсилвания штатида 22 ёшли Жейкоб Бакли президент Дональд Трампни ўлдириш билан таҳдид қилганликда айбланди. Бу ҳақда Centre Daily Times хабар берди. Айбловга йигитнинг TikTok ижтимоий тармоғида ёзган постлари сабаб бўлди. У 2025 йил 16 январь куни, Трамп ҳали сайланган президент мақомида бўлган пайтда, унга ва унинг тарафдорларига қарши таҳдидли постлар жойлаштирган.

Жанубий Корея прокуратураси собиқ биринчи хоним Ким Кон Хини ҳибсга олиш учун судга мурожаат қилди. Бу ҳақда Reuters хабар берди. Таъкидланишича, прокурорлар бу ҳақда 7 август куни маълум қилган. Бунгача собиқ биринчи хоним коррупцияда айбланиб тергов қилинаётган эди. Айни пайтда, прокуратура ҳибс ордери билан боғлиқ батафсил маълумот бермаган. Кимнинг адвокатлари унга қўйилган айбловларни рад этмоқда.

<iframe width="650" height="420" src="https://www.youtube.com/embed/Uj1b52kiV6Y" title="Xalqaro dayjest" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Ирода Жўраева, Улуғбек Тўхтаев, ЎзА