Эрон президенти Исроил махсус хизматлари томонидан унга қарши уюштирилган муваффақиятсиз суиқасд ҳақида маълум қилди. Бу ҳақда у америкалик журналист Такер Карлсонга берган интервьюсида маълумот берди. Пезешкиённинг сўзларига кўра, қотилликка уриниш Эрон раҳбариятининг бошқа юқори мартабали вакиллари билан учрашув пайтида содир бўлган. Исроил учрашув ўтказилаётган жойга зарба беришга уринган. Сиёсатчи Қўшма Штатларни бу воқеага алоқадор эмас деб ҳисоблайди.
Исроил бош вазири Биньямин Нетаньяху АҚШ президенти Дональд Трампни тинчлик бўйича Нобель мукофотига номзод қилиб кўрсатганини айтди. Нетаньяху ҳозирда расмий ташриф билан Вашингтонда бўлиб турибди. У АҚШ президенти билан кечки овқат пайтида уни Нобель учун номзод қилиб кўрсатганини айтган. Бу Трампнинг Эрон ядро объектларига зарба бериш ҳақидаги буйруғидан кейинги илк юзма-юз учрашув ҳисобланади.
Исроил ҳукумати агар Эрон уранни бойитишни қайта бошласа, унинг ядро объектларига ҳужум қилишни кўриб чиқмоқда. Бу ҳақда Axios нашри хабар берди.
Янги зарбаларни бериш сценарийларидан бири Эроннинг Фордо, Натанз ва Исфаҳондаги ядровий объектлардан юқори бойитилган уранни олиб чиқишга уриниши бўлиши мумкин, деди нашрга хабардор манбалар.
Россия президенти матбуот котиби Озарбайжон билан муносабатлардаги кескинлик юзасидан изоҳ берди. Унинг сўзларига кўра, Россия Озарбайжон билан юзага келган муаммолар конструктив тарзда ҳал қилинишига умид қилмоқда. У бу муаммолар “икки томонлама муносабатларнинг умумий руҳига мос равишда” бартараф этилиши кераклигини айтди.
АҚШ 1 августдан бошлаб Қозоғистондан келадиган товарлар учун 25 фоизлик бож жорий этади. Бу ҳақда президент Дональд Трамп ўзининг Truth Socialʼдаги саҳифасида маълум қилди. Сиёсатчи қозоғистонлик ҳамкасби Қосим-Жомарт Тоқаевга тегишли мактубни йўллади. Унда Трамп республика билан “янада мувозанатли ва адолатли САВДО” ўрнатиш ҳақида сўз юритган.
АҚШда қизамиқ билан касалланиш сони 33 йиллик рекордни янгилади. Бу ҳақда BBC хабар берди. Мамлакатда 4 июль ҳолатига кўра, 1 300 га яқин кишида қизамиқ инфекцияси аниқланган. Жон Хопкинс университети томонидан эълон қилинган маълумотлар ўта юқумли касалликнинг тарқалиши давом этаётганини кўрсатган. Бир вақтлар бу инфекциянинг мамлакатда “йўқ қилиниши” тахмин қилинганди.
<iframe width="650" height="420" src="https://www.youtube.com/embed/_WDVUJ-OFxk" title="XALQARO DAYJEST" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Ирода Жўраева, Улуғбек Тўхтаев, ЎзА