Исроил армияси ва дронлари қамалдаги Ғазо секторида 86 нафар фаластинликни, жумладан, ёрдам тарқатиш марказлари яқинида 56 кишини ўлдирди. Анклав жанубидаги Рафаҳ шаҳрида 24 июнь куни 27 нафар фаластинлик ёрдам пунктларида Исроил ҳарбийлари томонидан отиб ташланган. Ғазода уруш бошлангандан бери ҳалок бўлганлар 56 мингдан ошган, 131 848 киши яраланган.
Исроил армияси штаб бошлиғи Эяль Замир Эронга қарши уруш ҳали тугамаганини маълум қилди. Генерал тегишли баёнотни Эрон-Исроил ўртасида ўт очишни тўхтатиш бўйича сулҳ жорий этилгач эълон қилган.
“Муҳим бобни якунлаяпмиз, аммо Эронга қарши уруш тугамади. Биз жорий ҳарбий ҳаракатда эришилган ютуқларга асосланган янги бобга ўтмоқдамиз”, деди Замир.
Хитойда суд порахўрликда айбланаётган амалдорни ўлим жазосига ҳукм қилди, бироқ ҳукм ижроси икки йилга кечиктирилди. Маълум қилинишича, айбланувчи ноқонуний равишда 15 миллион доллардан ортиқ маблағ олган. Гап Хунан провинцияси Халқ сиёсий маслаҳат кенгаши қўмитаси раиси собиқ ўринбосари Дай Даожин ҳақида кетмоқда. Ҳукм 24 июнь куни Гуандун провинцияси Чжухай шаҳри судида эълон қилинган.
Россия президенти Владимир Путин жамоат жойларидаги белги, кўрсаткич, маълумот пештахталари ва бошқа визуал ахборот воситаларида хорижий сўзлардан фойдаланишни тақиқловчи қонун чиқарди. Ушбу қарор матни Қонун ҳужжатлари расмий порталида эълон қилинган. Янги қоидалар 2026 йил 1 мартдан кучга кириши айтилган. Қонун “рус тилини давлат тили сифатида ҳимоя қилиш”, хорижий тиллардан ўзлаштириш даражасини пасайтириш ва “замонавий адабий тил меъёрлари”га риоя этилишини таъминлашга қаратилган.
Хитойнинг Эндемик касалликларни назорат қилиш институти олимлари кўршапалакларда одамлар учун хавфли бўлган иккита янги вирусни аниқлади. Улар Нипаҳ ва Ҳендра вирусларига генетик жиҳатдан яқин ҳисобланади. Янги вируслар бош миянинг оғир яллиғланиши ва нафас йўллари касалликларини келтириб чиқариши мумкин.
Буюк Британия АҚШдан ядро қуролини ташувчи 12 та F-35А самолётини сотиб олиб, NATO ядровий миссиясига қўшилишни режалаштирди. Вазир 25 июнь куни бўлиб ўтаётган NATO саммити чоғида альянсни қўллаб-қувватлаш учун кўпроқ ҳаракат қилишга чақирмоқда.
<iframe width="650" height="420" src="https://www.youtube.com/embed/26NoEQr2fmY" title="general urush tugamadi hd" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Ирода Жўраева, Улуғбек Тўхтаев, ЎзА