Америка Қўшма Штатлари президенти Дональд Трамп 4 июнь куни 12 мамлакат фуқароларига мамлакатга киришни тақиқлаб қўйди.

Қарор “хорижий террорчилар” ва бошқа хавфсизлик таҳдидларидан ҳимояланиш мақсадида амалга оширилгани қайд этилди. Бу давлатлар қаторига Афғонистон, Мьянмар, Чад, Конго, Экваториал Гвинея, Эритрея, Гаити, Эрон, Ливия, Сомали, Судан ва Яман кабилар киради.

Яна 7 та давлат: Бурунди, Куба, Лаос, Серра Леоне, Того, Туркманистон ва Венесуэладан одамларнинг кириши қисман чекланган.

Ҳиндистоннинг Мадхя Прадеш штатидаги Тикамгар шаҳрида жойлашган Тал Коти саройи остидан йўқолган деб ҳисобланган ноёб ер ости кутубхонаси тасодифан топилди. Ушбу топилмада 50 мингга яқин ноёб нашрлар мавжуд.

Тикамгар туманининг янги раҳбари айтишича, болалигидан қадимий сарой остидаги “йўқолган кутубхона” ҳақидаги ривоятларни эшитиб келган ва уларни шахсан текширишга аҳд қилган. Унинг сезгиси уни алдамаган: улкан ёғоч эшиклар ортида, ёмғир мавсумида сувли сарой кираверишига деярли етиб келадиган кўл яқинлигига қарамай, яхши сақланган китоблар тўплами борлиги аниқланди.

АҚШ президенти Дональд Трамп россиялик ҳамкасби Владимир Путин билан 4 июнь куни телефон орқали мулоқот қилди. Суҳбатда томонлар Украинанинг “Ўргимчак тўри” номи остида Россия ҳарбий аэродромларига қилган операциясини ҳам муҳокама қилди.  

Суҳбат давомида Путин Украинада яқин орада тинчлик бўлишини кутмаслик кераклигини билдирган. Шунингдек, у Москва аэродромларига уюштирилган ҳужумга жавоб қайтарилишини таъкидлаган.

Тинч океанининг марказий қисмида 3 мингга яқин автомобиль, жумладан, 800 га яқин электромобиль олиб кетаётган Morning Midas юк кемасида ёнғин чиқди. Ҳодиса Адак оролидан (Аляска) 480 километр жанубда содир бўлган. Юк Мексикага олиб кетилаётгани маълум қилинган. Тутун палубалардан бирида пайдо бўлган. Бортдаги 22 кишининг бари эвакуация қилинган.

Россия Украина дронларини уриб тушириш учун Хитойда ишлаб чиқарилган лазердан фойдаланмоқда. Россия “Сокин овчи” номли паст баландликдаги лазерли мудофаа тизимидан фойдаланаётгани акс этган видеолар тарқалди. Бу Россия Украинага қарши кенг кўламли уруш даврида Хитойдан олган энг муҳим қурилмалардан биридир. Ушбу лазер душман дронларини аниқлаш, кузатиш вам йўқ қилишга мўлжалланган. Уни йўлтанламас томига ўрнатиш мумкин ва транспорт воситаси ичидан бошқариш имконияти мавжуд.

Илон Маскнинг SpaceX компанияси 2025 йилда тахминан 15,5 миллиард доллар даромад олиши кутилмоқда. Миллиардер 3 июнь куни компаниянинг космосдан оладиган тижорий даромади 2026 йили НАСАнинг тахминан 1,1 миллиард долларлик бюджетидан ошиб кетишини таъкидлаган. SpaceX даромад олишда тежамкор учириш хизматлари ва сунъий йўлдош алоқаларига таянган.

<iframe width="650" height="420" src="https://www.youtube.com/embed/4QyPgQJQkac" title="Xalqaro dayjest" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Ирода Жўраева, Улуғбек Тўхтаев, ЎзА